خلاصہ تحریک آزادی ہند اور جمعیت علمائے ہند
محمد یاسین جہازی قاسمی
9891737350
نحمدہٗ و نصلّی علٰی رسولہِ الکریم
ہندستان :دارالاسلام سے دارالحرب کی طرف
ملک ہندستان کا دارالحرب بن جانا مسلم ہندستان کی سیاسی تاریخ کا بہت اہم واقعہ تھا؛ لیکن ملک کی سیاسی نوعیت بدل جانے اور دار الاسلام سے دارالحرب ہو جانے کا عمل اتنی آہستگی سے ظہور میں آیا تھا کہ ایک صاحب نظر ہستی کو مستثنیٰ کر دینے کے بعد وقت کا کوئی مدبر اس کی آہٹ بھی نہ سن سکا۔ اتنا ہی نہیں؛ بلکہ متعدد اہل علم نے تو حالات کے انقلاب اور ملک کی سیاسی اور قانونی حیثیت یکسر بدل جانے کی نوعیت کو تسلیم کرنے ہی سے انکار کر دیا اور نہ صرف جنگ آزادی 1857ء کی ناکامی کے بعد بھی اس حقیقت کو نہ سمجھا؛ بلکہ بعض حضرات تو جہاد آزادی کی حرمت کا اعلان کرتے رہے۔
جہاد آزادی کا پہلا اور دوسرافتویٰ
1806ء میں دہلی پر قبضہ کرنے کے بعد اگر چہ انگریزوں نے بساط سیاست پر ’’شاہ عالم‘‘ کو ایک تاج دار کی حیثیت سے نمایاں کیا اور مملکت اور حکومت میں ایک عجیب و غریب تقسیم کر کے یہ اعلان کیا کہ ’’ملک بادشاہ کا اور حکم انگریز بہادر کا‘‘۔ اس بنا پر کچھ علما کو یہ خیال بھی ہوا کہ ہندستان بدستور ’’دار الاسلام‘‘ ہے؛ مگر وہ مستثنیٰ شخصیت -جس کا اوپر ذکر کیا گیا ہے اور جس نے ملک کی سیاسی اور قانونی حیثیت بدل جانے کا سب سے پہلے ادراک اور انقلابی اعلان کیا تھا- حکیم الہند حضرت مولانا شاہ عبد العزیز محدث دہلوی قدس سرہ کی تھی۔ انھوں نے انیسویں صدی کی پہلی دہائی میں -جب کہ ہندستان کے تخت پر شاہ عالم ثانی رونق افروز تھے- فتوی دیا کہ ہندستان کی سیاسی حیثیت بدل گئی ہے۔
(شیخ الاسلام کی سیاسی ڈائری، جلد اول، ص؍ 82-83)
در اصل ملکی حالات کے تناظر میں رہ نماؤں کے سامنے چار راستے تھے:
۱۔ وقت کے تقاضے اور قوم کے سیاسی مفادات سے اغماض برتیں اور خاموش رہیں۔
۲۔ تن آساں علما کی طرح ہندستان کو بدستور دارالاسلام قرار دیتے رہیں۔
۳۔ ملک کو دارالحرب قرار دے کر ہجرت کرجائیں۔
۴۔ دارالحرب کی حیثیت کو بدلنے کے لیے دوبارہ دارالاسلام بنانے کی جدوجہد کریں۔
ابن الوقت رہ نماؤں نے ہمیشہ کی طرح پہلی شکل اختیارکی۔مفادپرستوں نے دوسرے طریقے کو اختیار کیا، جس میں قادیانی، بریلوی اور سید احمد خاں کے نام نمایاں ہیں۔ تیسری راہ کو اختیار کرنا انفرادی طور پر کچھ لوگوں کے لیے، یا ایک مختصر جماعت کے لیے ممکن ہو سکتا تھا؛ لیکن ہندستان میں پھیلے ہوئے کروڑوں مسلمانوں کے لیے عملاً ممکن نہ تھا کہ ہندستان سے ہجرت کرجائیں۔ اگر ان میں سے ایک جماعت چلی بھی جاتی، تو مسئلہ پھر بھی اپنی جگہ برقرار رہ جاتا اور پیچھے رہ جانے والے مسلمانوں کی حالت اور بھی ابتر ہو جاتی اور انھیں گویا کفر و طاغوت کے حوالے کر دینا ہوتا۔چوتھا راستہ عزیمت کاتھا، جو ہمیشہ اصحاب عزم کے لیے مخصوص رہا ہے اور یہ راستہ سب سے دشوار گزار راستہ ہے۔
ان راہوں میں حضرت مولانا شاہ عبد العزیز نور اللہ مرقدہ نے جو راہ اختیار فرمائی، وہ یہی چوتھا راستہ تھا۔ چنانچہ حضرت مرحوم نے 1808ء،یا 1809ء میں سب سے پہلے جہاد کا فتویٰ دیا۔ پھر14؍ستمبر1857ء کی جنگ شاملی وتھانہ بھون کے لیے بھی جہاد آزادی کا فتوی دیا گیا۔
ملکہ وکٹوریہ کا معافی نامہ
اس جنگ کے بعد مسلمانوں کی عسکری طاقت تقریبا ختم ہوچکی تھی۔ اور چوں کہ جنگ کی قیادت علمائے کرام نے کی تھی، اس لیے اس کے بعد جو وحشیانہ مظالم اور جس درندگی کا مظاہرہ ایسٹ انڈیا کمپنی کے وحشی انگریزوں نے ہندستانیوں،بالخصوص مسلمانوںاور بالاخص علما کے ساتھ کیا،جس کی وجہ سے علما گوشہ نشینی پر مجبور ہوگئے ،اس سے برطانوی حکومت یہ سوچنے پرمجبور ہوگئی کہ اگر ہندستان کی حکومت ان خود غرض تجارت پیشہ لوگوں سے نہ لی گئی، توبرطانی قوم اور برطانوی تاج دنیا بھر میں بدنام ہوجائیںگے اور تہذیب وتمدن کا دعوی نیست و نابود ہو جائے گا،چنانچہ ہندستان میں ملکہ وکٹوریہ کی بادشاہت کا اعلاتے کرتے ہوئے یکم نومبر1858ء کو کوئین کاوہ نو نکاتی مشہور اعلان نافذ کیا گیا، جس میں مجرمین کے معاف کر دینے کا عام اعلان ہوا۔
آئینی آزادی کی پہلی قسط
1857ء کی جنگ سے ہندستان کو آئینی آزادی کی پہلی قسط ملی۔ 1861ء میں آئینی اصلاحات کا نفاذ کرتے ہوئے، ہندستان کی لیجیس لیٹیو کونسل میں تین ہندستانی نام زد کیے گئے۔
دارالعلوم دیوبند کا سنگ بنیاد
اس عام معافی کے اعلان کا فائدہ حجۃ الاسلام حضرت مولانامحمد قاسم نانوتویؒ کو بھی ہوا اور گرفتاری کا خوف جاتا رہا۔جنگ شاملی میں شکست سے حجۃ الاسلام نے یہ نتیجہ اخذ کیا کہ ہندستان سے انگلستان تک منظم لیڈرشپ میں، تربیت یافتہ فوجوں کے ساتھ جدید اسلحہ سے لڑنے والی قوم کا ہم قیادت سے محروم غیر منظم عوام کے سہارے گھریلو ہتھیار لاٹھی ڈنڈوں سے مقابلہ نہیں کرسکتے، چنانچہ انھوں نے معرکۂ رزم کے بجائے معرکۂ بزم برپا کیا اور 30؍ مئی 1866ء کو دارالعلوم دیوبندکی بنیاد ڈالی، جس نے جہادی آزادی کے متوالے اور رجال کار پیدا کرنے میں اہم اور نمایاں کردار ادا کیا۔
کانگریس کا قیام، سرسید کی مخالفت اور شرکت کانگریس کا فتویٰ
پھر جب28؍ دسمبر 1885ء میں آل انڈیا کانگریس بنی، جس نے حکومت کی پالیسیوں پر کڑی تنقید کرتے ہوئے سوراج اور حقوق کا مطالبہ کرنا شروع کیا، تو جناب سرسید احمد خان صاحب نے8؍اگست1888ء کوانڈین پیٹر یٹس ایسوسی ایشن (انجمن محبان وطن) بناکر مسلمانوں کو انگریزوں کی وفاداری کی تلقین کرنی شروع کردی اور کانگریس میں شرکت سے ورغلاتے رہے۔ بریولی مکتب فکر کے علما نے بھی اسی کی ہمنوائی کی، جس کے خلاف علمائے لدھیانہ، حضرت مولانا رشید احمد گنگوہیؒاور حضرت مولانا محمود حسن دیوبندی نے 11؍دسمبر 1888ء کو کانگریس میں شرکت اور سرسید کے مشن کی مخالفت کا فتویٰ دیا۔
آئینی آزادی کی دوسری قسط
جناب سرسید احمد خاں صاحب سمیت رجعت پسندوں کی مخالفتوں کے باوجود کانگریس کے بڑھتے اثرات کے پیش نظر 1892ء کے انڈین کونسلز ایکٹ کے مطابق، سینٹرل لیجسلیٹو کونسل میں تین کے بجائے پانچ ہندستانیوں کو نمائندگی دی گئی۔
انگریزوں کی گھناونی سازش:مسلم لیگ اور ہندو مہاسبھا کا قیام
انجمن محبان وطن کی ناکامی کے بعد، دسمبر1893ء کو تشکیل کردہ’’محمڈن اینگلو اورینٹیل ایسوسی ایشن،اوربعد ازاں1901ء میں محمڈن پولیٹیکل آرگنائزیشن بھی ناکام ہوگئی، تو انگریزوں کی خطرناک خفیہ سازش کے تحت مسلمانوں میں30؍دسمبر 1906ء کو مسلم لیگ اور ہندوؤں میں مہاراجہ دربھنگہ کی صدارت میں بھارت مہا منڈل (جو بعد میں چل کر ہندو مہاسبھاکے نام میںتبدیل کی گئی) کی تشکیل عمل میں آئی اور فرقہ وارانہ خطوط پر فیصلہ ہونے لگے، جو انگریزکی پالیسی: ’’لڑاؤ اور حکومت کرو‘‘ پر مبنی تھی۔
آئینی آزادی کی تیسری قسط
چنانچہ 1909ء میں ہندستانی کونسل کے ممبران بذریعۂ انتخاب چننے اور مسلمانوں کے لیے جداگانہ انتخاب کا فیصلہ کیا گیا۔ اور یہیں سے ہندستان میں فرقہ وارانہ فسادات کا آغاز ہوا۔
تحریک ریشمی رومال
1915-1916ء میں شیخ الہند حضرت مولانا محمود حسن دیوبندیؒ کی قیادت میں ’’ریشمی رومال تحریک‘‘ چلائی گئی،جس کا منصوبہ یہ تھا کہ برٹش سامراج کو اکھاڑ پھینکنے کے لیے افغان اور ترکی سرکاروں کے تعاون سے ہندستان کی شمال مغربی سرحدپر حملہ کیا جائے اور ادھر ہندستان کے لوگ بھی بغاوت کی لہر پیدا کرکے سلطنت برطانیہ کو تباہ و بربادکردیں؛ لیکن قبل از وقت راز فاش ہونے کی وجہ سے یہ تحریک ناکام ہوگئی۔
میثاق لکھنو اورمسلم لیگ کی غلط قیادت
لکھنو میں کانگریس کا اجلاس: 26 سے 30 ؍دسمبر 1916ء تک ، اورمسلم لیگ کا اجلاس: 30 سے 31 ؍دسمبر 1916ء تک ہوا۔انھیں اجلاسوں میں انڈین نیشنل کانگریس اور آل انڈیا مسلم لیگ کے درمیان میثاق لکھنو (Lucknow Pact)کے نام سے ایک معاہدہ ہوا، جس میں سب سے خطرناک فیصلہیہ ہوا کہ مسلمانوں کی نمائندگی ، ان کی آبادی کے تناسب سے گھٹا دی گئی۔ جس کی وجہ سے مسلمان بعض صوبوں میں اکثریت کے باوجود اقلیت میں آگئے۔
میثاق لکھنو پر مفتی اعظم ہند کا تبصرہ
ایسے وقت میں، جب کے مسلمانوں کے پاس مسلم لیگ کے علاوہ علما کی کوئی منظم جماعت نہیں تھی، تن تنہا مفتی اعظم ہند حضرت مولانا علامہ مفتی محمد کفایت اللہ صاحب نے 1917ء میں اس پر تنقیدی تبصرہ کیا۔ اور جنگ عظیم اول کے خاتمے کے بعد ہندستانیوں کو اصلاحات دینے کے مقصد سے ، پورے ہندستان کا دورہ کرکے ہندستانیوں کے مطالبات مرتب کرنے والے ایڈون مانٹیگوتک مسلمانوں کے مطالبات پہنچاکر پوری ملت کی طرف سے فرض کفایہ ادا فرمایا۔
آئینی آزادی کی چوتھی قسط
جنگ عظیم اول میں ہندستانیوں سے حکومت خود اختیاری دینے کے وعدے سے مکرتے ہوئے، مان ٹیگو چیمس فورٹ اصلاحات نافذ کی گئیں، پھر یہی اصلاحات گورنمنٹ آف انڈیا ایکٹ 1919ء کی بنیاد بنیں،جن کی رو سے مرکزی اسمبلی میں امپریل لیجس لیٹیو کونسل کی جگہ دو ایوانی مقننہ قائم کی گئی۔ لیکن ہندستانی اس سے بالکل بھی خوش نہیں ہوئے۔بلکہ اس کے برعکس برطانوی حکومت نے دفاع ہندستان ایکٹ 1915ء کے تحت انقلابی سرگرمیوں کو روکنے کے لیے 6؍فروری 1919ء کو رولٹ ایکٹ جیسا وحشیانہ قانون منظور کرنے کے لیے کونسل میں پیش کردیا۔
تحریک ترک موالات کا آغاز
24؍فروری 1919ء تک اس قانون کو واپس لینے کے لیے گاندھی جی کے الٹی میٹم کے باوجودجب قانون واپس نہیں لیا گیا، تو 30؍مارچ1919ء سے گاندھی جی نے ترک موالا ت کی تحریک اعلان کردیا۔ چنانچہ اس تاریخ سے پوری شدت کے ساتھ تحریک ترک موالات کا آغاز ہوگیا۔ اور لوگ جگہ جگہ اس قانون کے خلاف دھرنے اور مظاہرے کرنے لگے۔
حادثہ جلیان والا باغ اور تحریک ترک موالات کا التوا
رولٹ ایکٹ کی مخالفت میں 13؍اپریل1919ء کو جلیان والا باغ میں ایک پرامن مظاہرہ ہورہا تھا، جس پر جنرل ڈائر نے گولیاں برساکر ہندستانیوں کو لہو لہان کردیا۔ اس کی تحقیقات کے لیے جب ہنٹر کمیٹی بنائی گئی، تو گاندھی جی نے یہ کہہ کر اس تحریک کے عارضی التوا کا اعلان کردیا کہ ستیہ گرہ کے دو بنیادی اصول: سچ اور اہنسا کے اعتبار سے ابھی عوام کی مکمل تربیت نہیں ہوپائی ہے۔
خلافت کا خاتمہ اور تحریک خلافت کا آغاز
جب جنگ عظیم اول(18؍جولائی1914ء -11؍نومبر1918ء) میں دول متحدہ کو فتح ملنے کے بعد ہندستانی مسلمانوں کے ساتھ کیے گئے خلافت اسلامیہ اور اماکن مقدسہ کے تحفظ کے وعدوں کو پامال کرتے ہوئے30؍اکتوبر1918ء کوہوئی عارضی صلح کے ذریعے ترکی حکومت کے حصے بخرے کردیے گئے، تو علمائے کرام گوشہ نشینی سے نکل کر میدان عمل میں کودپڑے۔ اور23-24؍نومبر1919ء کو پہلی باقاعدہ خلافت کانفرنس ہوئی، جس میں عارضی صلح کے پیش نظر جگہ جگہ محفل جشن کا بائیکاٹ کرنے اور خلافت کی بقا تک ترک موالات جاری رکھنے کا فیصلہ و فتویٰ دیا گیا۔
جمعیت علمائے ہند کا قیام اورتحریک خلافت میں شرکت
اسی آل انڈیا خلافت کانفرنس کے موقع پر ملک کے کونے کونے سے تشریف لائے علمائے کرام نے عقائد و مسالک کے اختلافات سے اوپر اٹھ کر23؍نومبر1919ء کوبعد نماز عشا، پتھر والا کنواں دہلی میں جمعیت علمائے ہند کی تشکیل کی۔اور28،31؍دسمبر 1919ء و یکم جنوری 1920ء کومنعقد اپنے پہلے اجلاس عام میں ہی یہ فیصلہ کیا کہ12؍فروری تا10؍ اپریل1920ء کو لندن میں منعقد ہونے والی صلح کانفرنس میں مسلم نمائندوں کی شرکت ضروری ہے ، تاکہ خلافت سے متعلق مسلمانوں کے متفقہ مذہبی مطالبات کے مطابق فیصلہ کیا جاسکے۔ لیکن اس کانفرنس کے نتیجے میں 10؍اگست 1920ء کو سیورے معاہدہ ہوا، جس کی رو سے خلافت اسلامیہ کو ٹکڑے ٹکڑے کردیا گیا، تو 6؍ستمبر1920ء کو جمعیت علمانے کلکتہ میں ایک خصوصی اجلاس بلایا اور حضرت مولانا ابوالکلام آزاد کی تحریک پریہ فیصلہ کیا گیا کہ انگریزی حکومت کا مکمل بائیکاٹ کیا جائے۔اورپھر 8؍ستمبر1920ء کو اسی فیصلے کو شرعی تقاضاقرار دے کرترک موالات کا فتویٰ دیاگیا، جس پر تقریبا پانچ سو علمائے کرام نے دستخط کیے۔
بعد ازاں19-20-21؍نومبر1920ء میں جمعیت علما نے اپنے دوسرے اجلاس عام میں برطانیہ سے ترک موالات کے شرعی فیصلہ ہونے پر نقلی و عقلی دلائل پیش کیے۔ اور چوں کہ گاندھی جی نے تحریک خلافت کی بلاشرط حمایت کرکے ہندو مسلم اتحاد کا عملی نمونہ پیش کیا تھا، اس لیے اس اتحاد کی ستائش کی گئی۔
تحریک ہجرت ہند کا خاتمہ
پھر 18-19-20؍نومبر1921ء کو جمعیت علما نے اپناتیسرا اجلاس عام کیا،جس کے خطبۂ صدارت میں امام الہند حضرت مولانا ابوالکلام آزاد ؒنے ہندستانی مسلمانوں کو ایک امام کے ماتحت شرعی زندگی گذارنے کی دعوت دیتے ہوئے کہا کہ مسلمانوں کو ایک لمحہ بھی بغیر کسی امام کے بسر نہیں کرنا چاہیے، یا تو وہاں سے ہجرت کرجائیں اور یا ایک امیر نصب کرکے اپنے فرائض شرعیہ انجام دیں۔چنانچہ ان دنوں تحریک ہجرت چل رہی تھی، لیکن جمعیت علما کے ترک موالات کی تجویز نے اس تحریک کا خاتمہ کردیا۔
جمعیت کی طرف سے سب سے پہلے مکمل آزادی وطن کامطالبہ
علاوہ ازیں اس اجلاس کاایک ممتاز کارنامہ یہ تھا کہ اسی میں ترک موالات کے مقصد میں خلافت اسلامیہ کے تحفظ کے ساتھ ساتھ آزادی وطن کا اضافہ کرتے ہوئے تمام تنظیموں کے بالمقابل سب سے پہلے جمعیت علمانے ہندستان کی مکمل آزادی کا مطالبہ کیا۔ لیکن 5؍فروری 1922ء کوگورکھ پور ضلع میں واقع چوراچوری میں ایک پرتشدد واقعہ پیش آنے کی وجہ سے گاندھی جی نے جب تحریک کو ملتوی کردیا، تو9-10؍فروری1922ء کو منعقد اپنی مجلس منتظمہ کے اجلاس میں یہ فیصلہ کیا کہ اگرچہ اجتماعی سول نافرمانی ابھی زیر غورہے؛ لیکن انفرادی سول نافرمانی بدستور جاری ہے۔ یہی وجہ ہے کہ جب نومبر 1923ء میں الیکشن کا اعلان ہوا، تو جمعیت نے اپنی مجلس عاملہ منعقدہ: 11؍نومبر1923ء میں یہ فیصلہ کیا کہ کونسل کا الیکشن لڑنا جائز نہیں ہے۔ لیکن کانگریس کے ایک گروپ نے جمعیت علما سے الگ راہ اختیار کی اور الیکشن میں حصہ لیتے ہوئے، سوراج پارٹی کے ذریعہ 105منتخب کی گئی نشستوں میں 42 نشستوں پر جیت درج کرائی۔
آزادی ہند کی تحریک میں نفرت و شدھی کی رکاوٹ
گاندھی جی کی خلافت تحریک کی بلاشرط تائید کردینے کی وجہ سے ہندو مسلم اتحاد انتہائی عروج پر پہنچ گیا تھا، یہ چیز برطانوی حکومت کہاں برداشت کرنے والی تھی۔ چنانچہ اس نے ہندو مسلم اتحاد کو سبوتاژ کرنے کے لیے سوامی شردھانند کے ذریعہ شدھی اور پنڈت مدن موہن مالویہ کے ذریعہ سنگھٹن کی ارتدادی تحریکیں چلائیں، جنھیں جمعیت علمائے ہند نے13-16؍جولائی 1923ء کو منعقد مجلس منتظمہ کے اجلاس میں سخت ترین سیاسی حملہ قرار دیتے ہوئے ، ان کا زبردست مقابلہ کیا۔اور آزادی حاصل کرنے کے لیے باہمی فرقہ وارانہ ہم آہنگی کو ناگزیر قرار دیا۔
اسی طرح 29-30-31؍دسمبر1923ء و یکم جنوری 1924ء کو جمعیت علما نے اپنے پانچویں اجلاس عام کے خطبۂ صدارت میں برطانوی حکومت ہند کا مقابلہ،جزیرۃ العرب کی آزادی کے ساتھ مقدس مقامات کا تحفظ اور ہندستان کی آزادی کو مسلمانان ہند کے ضروری فرائض قرار دیے۔اور مواثیق ملی پر اپنا واضح موقف پیش کیا۔
خاتمۂ خلافت کے اعلان پر جمعیت کی بے چینی
3؍مارچ1924ء کو مجدد خلافت نے ایشائی مسلمانوںکے جذبات کے برعکس خلافت کا خاتمہ کرتے ہوئے ترکی حکومت کو پارلیمنٹری نظام کے ماتحت کردیا،جس پر جمعیت علما اور مرکزی خلافت کمیٹی نے مشترکہ طور پر 9؍مارچ 1924ء کو یہ فیصلہ کیا کہ مصطفی کمال پاشا کو تار بھیج کر خلافت کی بحالی کا مطالبہ کیا جائے؛ لیکن پاشا صاحب نے اسے ایک خیالی تصور قرار دے کر مسترد کردیا۔
ہندو مسلم اتحاد کی کوششیں
26؍ستمبر سے 2؍اکتوبر1924ء کو ہندو مسلم اتحاد کے لیے ملاپ کانفرنس کی گئی، جس میں جمعیت علمائے ہند نے زبردست کردار ادا کیا۔بعد ازاں 9؍ستمبر1927ء کو شملہ میں اتحاد کانفرنس ہوئی، اس میں جمعیت علما نے اتحاد کی مکمل کوشش کی۔بعد ازاں کلکتہ میں27؍اکتوبر 1927ء کو کلکتہ اتحاد کانفرنس ہوئی، جس کی ناکامیوں پر تبصرہ کرتے ہوئے حضرت العلامہ انور شاہ کشمیری ؒ نے آٹھویں اجلاس عام (منعقدہ: 2-5؍دسمبر1927ء )کے صدارتی خطاب میں فرمایا کہ :
بہرحال فیصلہ ایک ہی اصول پر ہوسکتا ہے ،یا تو استیفائے حق کو بنائے فیصلہ قرار دے لیا جائے اور کوئی قید عائد نہ کی جائے، یا رواداری کو مدار فیصلہ قرار دیا جائے اور دونوں فریق کے لیے حدود رواداری معین کردی جائیں۔
سیاست عین دین ہے
الغائے خلافت نے ایشائی مسلمانوں کو بسمل بنادیا تھا اور ہندستانی علما کی سیاست سے بے اعتنائی انھیں نیم جاں کر رہی تھی، ایسے حالات میں 11تا 16؍جنوری 1925ء کو جمعیت علما نے اپنے چھٹے اجلاس عام کے خطبۂ صدارت میں زوال خلافت کے اسباب پر سیرحا صل بحث کرتے ہوئے یورپ کی تشریح حریت، جمہوریت فاسدہ اور وطنیت کی زمین پر قومیت کی تعمیر کو زہریلے جراثیم قرار دیتے ہوئے ’’سیاست عین دین ہے‘‘ کی حقیقت کو اجاگر کیا اور علمائے کرام کو میدان عمل میں آنے کی دعوت دی۔اور ہندستان کی مکمل آزادی کے حصول تک ترک موالات جاری رکھنے کا اعلان کیا۔
کیا ترک موالات کا حکم اب بھی باقی ہے
ترک موالات کا بنیادی پس منظر تحفظ خلافت تھا، 3؍مارچ1924ء کو خاتمۂ خلافت کے اعلان کے بعد ، فتویٰ کی بعض وجوہات باقی نہیں رہی تھیں۔ نومبر1926ء میں مرکزی قانون ساز اسمبلی کے الیکشن ہونے والے تھے، اس لیے کچھ حلقوں کی طرف سے، ترک موالات کے فتویٰ میں تبدیلی کا مطالبہ سامنے آنے لگا۔ چنانچہ اسی مسئلے پر غور کرنے کے لیے تشکیل کی گئی ایک سب کمیٹی نے 22؍ستمبر1926ء کو اپنی رپورٹ پیش کرتے ہوئے کہا کہ اگر حقیقتا اعدائے دین سے موالات مقصود نہ ہو، تو قوم و وطن کے مفاد کے تحفظ کے لیے بقاعدۂ اھون البلیتین الیکشن میں شرکت کی گنجائش ہے۔
جداگانہ انتخاب کے حوالے سے جمعیت علمائے ہند کا موقف
چنانچہ وزیر ہند مسٹر لارڈ برکن ہیڈ نے 1927 ء میںاعلان کیاکہ:
’’برطانیہ، ہندستان کو نئی اصلاحات دینے کا ارادہ رکھتا ہے؛ بشرطیکہ وہاں کے باشندے اپنے لیے مخلوط انتخاب پسند کریں؛ کیوںکہ اس کے بغیر ہندستان ترقی نہیں کر سکتا۔‘‘
اس اعلان کے پیش نظر،28؍ مارچ 1927ء کو مسلمان رہنماؤں نے،31؍مارچ 1927ء کو آل انڈیا کانگریس نے، 21؍اپریل1927ء کو ہندو مہاسبھا نے،22؍اپریل 1927ء کو پنجاب ہندو مہاسبھا نے،اور25؍اپریل1927ء کو سکھوں کے نمائندوں نے مخلوط اور جداگانہ انتخابات کے تعلق سے اپنے اپنے مطالبات کی فہرست پیش کی۔حالاں کہ مسلمانوں کی نجات جداگانہ انتخاب میں تھی،اس کے باوجود، آزادی ہندکے عزیز مقصد کو حاصل کرنے کے لیے، جمعیت علمائے ہند نے اپنے آٹھواں اجلاس عام، منعقدہ: 2-3-4-5؍ دسمبر1927ء میں سات مطالبات کی منظوری کے ساتھ مخلوط انتخاب کو قبول کرنے کا فیصلہ کیا۔اس کے بعد یکم جنوری 1929ء کو منعقد آل مسلم پارٹیز کی کانفرنس میں بھی مسلمانوں کے لیے جداگانہ انتخاب کے فیصلے کا اعادہ کیا گیا؛ لیکن مجلس عاملہ: منعقدہ: 3؍اگست 1931ء میںجب آزادی ہندستان کے لیے مسلمانوں کے حقوق پر مبنی ’’جمعیت علما کا فارمولا‘‘ منظور کیا گیا، تو اس کی دفعہ (۸) میں حتمی و قطعی فیصلہ کیا کہ:’’ طریقۂ انتخاب مخلوط ہوگا۔‘‘
سائمن کمیشن کا بائیکاٹ
ترکی کی جس خلافت اسلامیہ کے تحفظ کے لیے دنیا لڑ رہی تھی، اہل ترک نے خود اپنے ہی ہاتھوں اس کو دفن کرکے یورپین کی مدتوں کی سازش کو دفعۃ کامیاب کردیا، جس کی وجہ سے ہندستان میں بھی ہمیشہ کے لیے اس مسئلہ کا خاتمہ ہوگیا۔لیکن تحریک خلافت نے بھارتیوں کے دلوں میں اپنی غلامی کے تئیں جذبۂ آزادی کی جو آگ بھڑکادی تھی، اس نے برطانوی ہند کے ارباب اقتدار کو بھارتیوں کے مطالبات سننے پر مجبور کردیا، چنانچہ آئینی اصلاحات دینے کے وعدے کے ساتھ، گورنمنٹ آف انڈیا ایکٹ 1919ء کی شق 84(A)؍ کے تحت 1927ء میں تاج برطانیہ کی طرف سے ایک شاہی فرمان کے ذریعے8؍اکتوبر1927ء کو سائمن کمیشن کے قیام کا اعلان کیا گیا۔ چوں کہ اس میں ہندستانیوں کا کوئی نمائندہ شامل نہیں کیا گیا تھا، اس لیے صدر جمعیت علمائے ہند حضرت العلامہ مفتی محمد کفایت اللہ صاحب نور اللہ مرقدہ نے 18؍ نومبر 1927ء کو ،22؍نومبر1927ء کو ناظم عمومی جمعیت علمائے ہند حضرت مولانا احمد سعید صاحب برد اللہ مضجعہ نے، بعد ازاں 2تا 5؍ دسمبر1927ء کو منعقد آٹھویں اجلاس عام میں جمعیت علمانے اس کے مقاطعہ کا اعلان کرتے ہوئے کہا کہ ’’سائمن کمیشن ہندستان کے باشندوں کی کھلی ہوئی توہین ہے ۔ ‘‘ اورجب 3؍فروری1928ء کو سائمن کمیشن ممبئی کے ساحل پر اترا، تو ’’سائمن کمیشن واپس جاؤ‘‘ کے نعرے کے ساتھ مکمل ہڑتال کرکے کمیشن کو اپنے مقصد میں ناکام کردیا۔ لیکن کمیشن نے جاتے جاتے بھارتیوں کو چیلنج دیا کہ دم ہے، تووہ فرقہ وارانہ اتحاد قائم کرکے دکھائیں اور اپنا نیا قانون بناکر پیش کریں۔ چنانچہ بھارتیوں نے چیلنج کو قبول کیا اور فرقہ وارانہ اتحاد کی کوششوں کے ساتھ، نہرورپورٹ کے نام سے ایک نیا آئین بھی بنانے کا اعلان کیا۔
نہرورپورٹ قطعی منظور نہیں
8؍ نومبر 1927ء کوسائمن کمیشن کا اعلان کرتے ہوئے وزیر ہند مسٹر لارڈ برکن ہیڈ نے کہاکہ: ’’میں پیش گوئی کرتا ہوں کہ ہندستان کے لوگ متحدہ آئین پیش نہیں کریںگے۔‘‘
اس جملے کو ہندستانیوں نے اپنے لیے چیلنج تصور کیا ۔ اور اس چیلنج کو نہ صرف قبول کیا؛بلکہ سائمن کمیشن کا مکمل طور پر بائیکاٹ کرکے ایک متفقہ آئین بنانے کا عندیہ بھی دیا۔اور جواہر لال نہرو کی صدارت میں ایک کمیٹی تشکیل دے کر ’’نہرو رپورٹ ‘‘ تیار کی گئی۔ جب یہ رپورٹ 16؍ اگست 1928ء کو شائع کی گئی، تو مسلم حقوق کے تحفظ کی کوئی ضمانت نہ ہونے اور مکمل آزادی کے بجائے ڈومینین اسٹیٹس کی سفارش کرنے کی وجہ سے27؍اگست1928ء کی مجلس عاملہ نے یہ فیصلہ کیا کہ اسے کسی بھی صورت میں قبول نہیں کیا جاسکتا ؛ کیوں کہ جمعیت علمائے ہند اپنے نصب العین مکمل آزادی سے پیچھے نہیں ہٹ سکتی۔
اسی درمیان یکم جنوری 1929ء کو ہندستان کے مجوزہ دستور حکومت میںمسلمانوں کے مذہبی و قومی حقوق کے تحفظ کے لیے آل انڈیا مسلم کانفرنس میں ایک متفقہ فارمولاتیار کیا گیا۔آل انڈیا مسلم لیگ نے بھی 28؍مارچ 1929ء کو ایک فارمولا پیش کیا، جو ’’چودہ نکات‘‘ سے مشہور ہے۔
جمعیت کی شدید مخالفت کے باوجود کانگریس نے 5؍نومبر1928ء کواس رپورٹ کو ایک سال کے لیے منظور کرلیا۔ لیکن جب کامل ایک سال گذرنے کے باوجودانگریزوں نے نہرو رپورٹ کو قابل اعتنا نہیں سمجھا، تو بالآخر مجبور ہوکر کانگریس نے بھی 28؍دسمبر1929ء کو اس رپورٹ کو دریائے راوی کے حوالے کرتے ہوئے مکمل آزادی کی تجویز منظور کی۔ اور اسے عملی جامہ پہناتے ہوئے 12؍مارچ1930ء کو نمک تحریک کا آغاز کیا۔
مجلس احرار اسلام ہند کا قیام
نہرو رپورٹ میں جہاں اقلیتوں کے مسائل و تحفظات کو یکسرنظر انداز کردیا گیا تھا، وہیں اسے دریابرد کرتے وقت مسلمانوں سے مشورہ لینا بھی مناسب نہیں سمجھا، جس سے دل برداشتہ ہوکر مسلمانوں کے کچھ رہنماؤں نے اپنی الگ تنظیم کی ضرورت کو شدت سے محسوس کرتے ہوئے، 29؍دسمبر1929ء کو کانگریس ہی کے پنڈال میں ’’مجلس احرار اسلام ہند‘‘ قائم کیا، جس نے آزادی ہند کی تحریکوں میں نمایاں کردار ادا کیا۔
وطن کی شرعی حیثیت:جہاد آزادی میں غیر مسلموں سے تعاون کا مسئلہ
جمعیت علمائے ہند نے 11تا14؍مارچ 1926ء کو منعقد اپنے ساتویں اجلاس عام میں، 18تا20؍نومبر 1921ء کو منعقدتیسرے اجلاس عام کے منظور کردہ’’ آزادی کامل‘‘ کے فیصلے کا اعادہ کرتے ہوئے حصول آزادی کو مسلمانوں کا مذہبی فرض قرار دیا،اور اس کے حصول کے لیے ترک موالات کے فتوے میں تبدیلی کے مطالبے کے باوجود 21-22 ؍ ستمبر 1926ء کی مجلس عاملہ میں یہ فیصلہ کیا کہ اھون البلیتین کے پیش نظر انگریزوں سے بائیکاٹ اور برادران وطن کا تعاون ضروری ہے، تو اہل علم کے درمیان یہ مسئلہ موضوع بحث بنا کہ ایک مذہبی فرض کی ادائیگی کے لیے کیا غیر مسلموں سے تعاون لیا، یا دیا جاسکتا ہے؟چنانچہ حضرت العلامہ انور شاہ کشمیری نور اللہ مرقدہ نے آٹھویں اجلاس عام (منعقدہ:2تا5؍دسمبر1927ء ) میں یہ حل پیش کیا کہ ہندستان نہ تو دارالاسلام ہے اور نہ ہی مکمل دارالکفر؛ بلکہ دارالامان ہے اور دارالامان میں مذہب کی آزادی اور بنیادی حقوق کے تحفظات کی ضمانت پر مبنی جمہوریت کی شرائط کے ساتھ غیروں کا تعاون لے بھی سکتے ہیں اوردے بھی سکتے ہیں۔ چنانچہ یہی شرعی حل آگے چل کر3تا6؍مئی 1930ء کو منعقد نویں اجلاس عام میں آل انڈیا کانگریس میں مسلمانوں کی شرکت کے فیصلے کا باعث بنا۔فیصلے میں کہا گیا کہ:
’’اس لیے یہ اجلاس مسلمانوں سے اپیل کرتا ہے کہ ملک و ملّت کی آزادی اور اپنے پرسنل لاء کی حفاظت کے لیے پورے جوش اور کامل استقلال سے احکام شرعیہ کے موافق کانگریس کے ساتھ اشتراکِ عمل کرتے ہوئے سرفروشانہ پُرامن جنگِ آزادی کی راہ میں گامزن ہوں۔‘‘
نمک تحریک اور جمعیت علمائے ہند کا دائرۂ حربیہ
نمک تحریک کا آغاز ہوتے ہی انگریزوں نے کانگریسیوں اور جمعیت علما سے وابستہ افراد کی دھڑپکڑ شروع کردی۔ چنانچہ اس تحریک کے لیے افراد مہیا کرنے کے مقصد سے جہاں کانگریس نے جنگی کونسل بنائی، وہیں جمعیت علمائے ہند نے 13؍ جولائی 1930ء کو دائرۂ حربیہ کی تشکیل کرکے بے خطر میدان عمل میں کود پڑے،جن کی پاداش میں بھارتیوں نے اور جمعیت علما کے رہ نماؤں نے قیدوبند کی صعوبتیں جھیلیں؛ بالخصوص مفتی محمد نعیم صاحب لدھیانوی، مولانا عبدالحلیم صاحب صدیقی، مولانا حفظ الرحمان صاحب سیوہاروی،مولانا ابوالکلام آزاد،مولانا عطاء اللہ شاہ بخاری،مولاناحسن سجاد ابن مولانا ابوالمحاسن مولانا محمد سجاد صاحب،مولانا احمد سعید صاحب،مولانا نور الدین صاحب بہاری،مفتی اعظم مفتی محمد کفایت اللہ صاحب،مولانا عبدالغفور لدھیانوی، مولانا محمد علی کاندھلوی کے علاوہ سینکڑوں کارکنان جمعیت علماکو پابند سلاسل کردیا۔ علاوہ ازیں 23؍ اپریل 1930ء کو قصہ خوانی بازار میں نہتے مظاہرین پر گولیاں برسائی گئیں۔ 7؍ اکتوبر 1930ء کو لاہور سازش مقدمے کے ذریعہ بھگت سنگھ اور اس کے ساتھیوں کو تختۂ دار پر لٹکانے کا جابرانہ فیصلہ کیا گیا، جس کے خلاف جمعیت علمانے 9؍ اکتوبر 1930ء کو زبردست احتجاج کیا۔ ان قربانیوں نے ہندستان کو آزادی کے قریب کردیا۔
پہلی گول میز کانفرنس لندن کی مخالفت
تحریک سول نافرمانی اور بدیشی مال کے بائیکاٹ نے تخت لندن کو ہلاکر رکھ دیا۔چنانچہ جون1929ء میں برطانیہ کے عام انتخابات کے نتیجے میں جب ریمزے میکڈونالڈ (Ramazy Mac Donald )وہاں کا وزیر اعظم بنا، تو انھوں نے ہندستان کے بارے میں اپنے مشیروں کے ساتھ صلاح ومشورے کے بعد سر جان سائمن کی سفارش منظور کرتے ہوئے فیصلہ کیا کہ برطانوی ہند میں آئینی تعطل کو دور کرنے کے لیے بھارت کے لیڈروں کو لندن بلاکر آئین کے بارے میں ان کی باہمی رضامندی حاصل کیا جائے۔
چنانچہ یکم نومبر1929ء کو وائسرائے ہند لارڈارون نے ایک اعلان کے ذریعہ،بظاہراسی مقصد سے 12؍ نومبر 1930ء ، تا 19؍ جنوری 1931ء تک پہلی گول میز کانفرنس لندن منعقد ہوئی۔لیکن برطانوی حکمت عملی کی وجہ سے یہ کانفرنس ہندو مسلم بحث کا اکھاڑا بن گئی ، کیوں کہ مسلمانوں نے مسٹر جناح کے بجائے سرآغا خاں کواپنا نمائندہ منتخب کیا، اور انھوں نے اپنی تمام تر وکالت سر محمد شفیع کے سپرد کردی، اس لیے مسٹر جناح کانفرنس میں شرکت کے باوجود الگ تھلگ رہے۔ کانگریس نے بھی شرکت سے انکار کردیا تھا۔
چوں کہ جمعیت علما انگریزوں کی فریب کاریوں سے بہ خوبی واقف تھی، اس لیے اس کانفرنس کے انعقاد سے پہلے ہی 7؍ نومبر 1929ء کو ایک بیان کے ذریعہ،اور کانفرنس کے انعقاد کے بعد، اپنے نویں اجلاس عام (3-6؍مئی 1930ء) میں یہ فیصلہ کیا کہ جب تک اقلیتوں کو مطمئن کرنے والا فارمولہ تیار نہ ہوجائے، اس وقت تک کوئی گول میز کانفرنس کامیاب نہیں ہوسکتی۔ بعد ازاں 10؍ جون 1930ء کو ایک عظیم الشان اجلاس کے ذریعہ اس میں شرکت کی زبردست مخالفت کی۔
اس کانفرنس کے ایک اجلاس میں مولانا محمد علی جوہر صاحب نے یہ تاریخی جملہ کہا کہ: ’’ مائی لارڈ! تقسیم کرو اور حکومت کرو‘‘ کا دستور آج دنیا میں عام ہے، مگر ہندستان میں ہم تقسیم ہوتے ہیں اور آپ حکومت کرتے ہیں۔‘‘
بعد ازاں 19؍جنوری 1931ء کوبرطانوی وزیر اعظم کے ذریعہ پہلی گول میز کانفرنس کی کارروائیوں کے خلاصہ کا، اور 25؍جنوری 1931ء کو اسی سے متعلق وائسرائے ہند مسٹر ارون کا اعلان شائع کیا گیا، تویکم فروری 1931ء کو مولانا ابوالمحاسن محمد سجاد علیہ الرحمہ نے ان اعلانات کو بے حقیقت اور ناقابل عمل قرار دیا۔
گاندھی ارون معاہدہ
قصۂ مختصر بھارتیوں کے بائیکاٹ کی وجہ سے پہلی گول میز کانفرنس ناکام ہوگئی، تو برطانوی وزیر اعظم نے 19؍جنوری 1931ء کو اور ہندستانی وائسرائے ارون نے 25؍جنوری 1931ء کو ہندستانیوں کے ساتھ صلح کرنے کی پیشکش کی،جس کے نتیجے میں5؍مارچ 1931ء کو گاندھی ارون معاہدہ ہوا، جس کی رو سے جمعیت علما نے 19؍مارچ 1931ء کو عارضی طور پر دائرہ ٔ حربیہ کی سرگرمیوں کو مشروط طور پر ملتوی کرنے کا فیصلہ کیا اور ہندو مسلم مسائل کے تصفیہ کے لیے کوششیں تیز کردی گئیں۔
ہندو مسلم اتحاد کو متعدد کوششیں
برطانوی حکومت ہند نے ایک عذر لنگ یہ بھی پیش کیا تھاکہ ہندستانی فرقہ وارانہ خطوط میں تقسیم ہیں، آخر حکومت خود اختیاری دی جائے، تو کس فرقہ اور مذہب کو دی جائے، جس کے لیے ہندستانیوں نے ہندو مسلم مفاہمت کی حتی الامکان کوشش کی۔ چنانچہ اس کے لیے 9؍ستمبر 1927ء کو منعقد ایک مشترک اجلاس میں ہندو مسلم دونوں نے اپنے مطالبات کی فہرست پیش کی، لیکن 13؍ستمبر1927ء کو گائے اور مسجد کے سامنے باجا بجانے کے مسئلے پر اتحادنہ ہوسکنے کی وجہ سے اتحاد کمیٹی ناکام ہوگئی۔ لیکن 27-28؍اکتوبر1927ء کو منعقد اجلاس میں اتحاد پیدا کرنے کی دوبارہ کوشش کی گئی۔ ہندو مسلم اتحاد کی کوششیں جاری تھیں کہ انگریزوں کی ایک خفیہ سازش کے تحت توہین رسالت پر مبنی کتاب’’رنگیلا رسول‘‘ کے مقدمہ میں، اس کے ناشر راجپال کو 5؍مئی 1927ء کو بری کردیا، اس سے حوصلہ پاکر کچھ اخبارات و رسائل نے بھی خاتم الانبیا ﷺ کی ذات گرامی پر کیچڑ اچھالا، جن سے ہندو مسلم کی اتحاد کی بنیادیں کمزور پڑنے لگیں ۔ جمعیت علما نے جہاں ایک طرف توہین رسالت کے مجرمین کے خلاف ملک گیر احتجاج کیے اور سخت قانونی کارروائی کی جدوجہد کی، وہیں حصول آزادی کے لیے ہندومسلم اتحاد کے لیے کوششیں برابر جاری رکھیں۔چنانچہ یکم جنوری 1929ء کو منعقد آل انڈیا مسلم کانفرنس میں مسلمانوںکے مذہبی و قومی حقوق کے تحفظ کے لیے ان کا ایک متفقہ فا رمولا تیار کرنے میں بنیادی کردار ادا کیا۔علاوہ ازیں 3-6؍مئی 1930ء کے نویں اجلاس عام میں نہ صرف ہند و مسلم کا مشترکہ پلیٹ فارم کانگریس سے عملی طور پر شراکت کی؛ بلکہ باہمی اتحاد کے خلاف کام کرنے والے آریوں اور مہاسبھائیوں کو کانگریس سے باہر نکالنے کا مطالبہ بھی جاری رکھا۔
22؍مارچ 1931ء کو مسلم حقوق کے تحفظ پر مبنی ایک فارمولا گاندھی جی کو پیش کرتے ہوئے، اس کی منظوری کا مطالبہ کیا۔اس کے بعد نواب بھوپال کی زیرسرکردگی 10-11؍مئی 1931ء کو ، بعد ازاں 19-20؍جون1931ء کو شملہ میں ہندو مسلم مفاہمت کا مسودہ تیار کرنے کے لیے کانفرنسیں کی گئیں، لیکن یہ سب کوششیں ناکام رہیں۔
فرقہ وارانہ مسائل کے حل کے لیے31؍مارچ 1931ء کو کانگریس نے، مسلم نیشنلسٹ کی طرف سے ڈاکٹر مختار احمد انصاری نے،11؍مئی 1931ء کو ہندو مہاسبھا نے،22؍جولائی 1931ء کو مجلس احرار اسلام نے، ان کے علاوہ کئی اور تنظیموں نے اپنی اپنی تجاویز پیش کیں۔ 3؍ اگست1931ء کو منعقد مجلس عاملہ کے اجلاس میں کانگریس کے فارمولا پر غور کرتے ہوئے، جمعیت علما نے اپنا ایک فارمولا پیش کیا، جو تاریخ میں ’’جمعیت کا فارمولا‘‘ کے نام سے مشہور ہے۔
دوسری گول میز کانفرنس
فرقہ وارانہ مسائل کے تصفیہ کے لیے تجاویز کی تیاری کا ایک بنیادی مقصد دوسری گول میز کانفرنس میں پیش کرنا تھا۔ چنانچہبرطانوی ہندستان کے لیے آئینی اصلاحات پر تبادلۂ خیال کے مقصد سے دوسری گول میز کانفرنس 7؍ ستمبر1931ء سے یکم دسمبر 1931ء تک لندن میں منعقد ہوئی۔ چوں کہ گاندھی جی کا اصرار تھا کہ کانگریس کو سارے ہندستانیوں کی واحد نمائندہ جماعت تسلیم کی جائے، جو تسلیم نہیں کیا گیا۔ اسی طرح مسٹر جناح نے اپنے مشہور چودہ نکات پیش کیے، لیکن برطانیہ نے کوئی بھی مطالبہ منظور کیا؛ بلکہ برطانوی حکام نے ہندستان کی آزادی کے بجائے راجواڑوں پر توجہ دی اور گیارہ نکات پر مشتمل ’’اقلیتوں کا میثاق‘‘ کے نام سے ایک مشترکہ معاہدہ جاری کردیا، جسے ہندستانیوں نے قبول نہیں کیا، اور اس طرح یہ کانفرنس بھی ناکام رہی۔
ڈکٹیٹر شپ کا آغاز
دوسری گول میز کانفرنس کی ناکامی کے بعد وائسرائے ہند ولنگڈن نے ہندستان کو اصلاحات دینے کے بجائے چار چار آرڈی نینس جاری کرتے ہوئے جبرو تشدد کا راستہ اختیار کیا، جس کے خلاف خفتہ تحریک سول نافرمانی میں پھربیداری آگئی اور تمام حریت پسند میدان عمل میں کود پڑے۔ جمعیت علمائے ہند نے 29؍فروری تا 2؍مارچ1932ء کو منعقد اپنی مجلس عاملہ میں تحریک سول نافرمانی کو باقاعدہ اور منظم طور پر چلانے کے لیے صدور و نظمائے عمومی کے سلسلے کو توڑ کر ڈکٹیٹرانہ نظام کا آغاز کیا اور حضرت العلامہ مفتی محمد کفایت اللہ صاحب صدر جمعیت علمائے ہند نے خود کو پہلا ڈکٹیٹر قرار دیتے ہوئے، اس سلسلے کا آغاز کیا۔ یکے بعد دیگرے بارہ ڈکٹیٹران فرنگی قیدو بند کے شکار ہوئے۔
برطانیہ کا کمیونل ایوارڈ اور ہندستانیوں کا رد عمل اور باہمی جوتم پیزار
خود ہندستانی باہمی فرقہ وارانہ حقوق کے تصفیہ کی جدوجہد میں مصروف تھے کہ 16؍اگست 1932ء کو برطانوی وزیر اعظم نے کمیونل ایوارڈ(فرقہ وارانہ تصفیہ ) کا ایک فارمولا شائع کیا۔ چوں کہ اس میںہندستانیوں کے طرف سے پیش کردہ کسی بھی مطالبہ کو معقول طورپر شامل نہیں کیا گیا تھا،اس لیے 18؍اگست 1932ء کو کانگریس نے، اور 20؍اگست 1932ء کو جمعیت علمائے ہند نے،27؍اگست 1932ء کو مجلس احرار اسلام ہند نے اسے نامنظور کرتے ہوئے مکمل آزادی کے حصول کی جدوجہد کو جاری رکھنے کا اعلان کیا۔2؍ستمبر1932ء کو مسلم لیگ نے بھی قبولیت کی غیریقینی موقف کا اظہار کیا۔
ادھر دوسری طرف وزیر اعظم برطانیہ نے اپنے 16؍اگست 1932ء کے بیان میں یہ بھی اعلان کیا تھا کہ اگر ہندستانی کمیونل ایوارڈ کے متعلق متفقہ طور پر کوئی فارمولا پیش کریں گے، تو اسے قبول کیا جائے گا۔ چنانچہ اسی مقصدکے پیش نظر 15-16؍ اکتوبر1932ء کو آل پارٹیز کانفرنس الٰہ آباد میں فرقہ وارانہ مسائل کے تصفیہ پر بحث و گفتگو کے بعد جمعیت کے فارمولے کو منظوری دی گئی۔پھر 3؍نومبر 1932ء سے مسلسل سترہ دنوں تک مسلمانوں، ہندوؤں اور سکھوں کے درمیان فرقہ وارانہ حقوق پر بحث و گفتگو ہونے کے بعد ایک متحدہ مطالبہ کا مسودہ تیار کیا گیا۔بعد ازاں 10تا 12؍ دسمبر1932ء کو لکھنو میں آل پارٹیز مسلم کانفرنس کی گئی ، جس میں الٰہ آباد کانفرنس کے فیصلوں کی منظوری دی گئی۔پھر 13؍دسمبر سے 24؍ دسمبر تک الٰہ آبا دمیں ایک اور کانفرنس ہوئی، جس میں لکھنو آل پارٹیز کانفرنس کے فیصلوں کی جزوی ترمیم کے بعد منظوری دی گئی۔ ان تمام کانفرنسوں میں جمعیت علما نے اہم کردار ادا کیا۔ پھر 29؍دسمبر1932ء سے 2؍جنوری 1933ء تک کلکتہ میں سبجیکٹ کمیٹی کے اجلاس ہوئے۔ لیکن نشستوں کے تعین کو لے کر فیصلہ نہ ہوسکنے کی وجہ سے یہ کانفرنسیں اپنے مقصد میں ناکام ہوگئیں، اس پر جمعیت علما نے 19تا 21؍اگست 1933ء کو منعقد مجلس عاملہ کے اجلاس میں سخت افسوس کا اظہار کیا۔
تیسری گول میز کانفرنس
گول میز کانفرنس کا تیسرا اور آخری دور17؍ نومبر 1932ء سے 24؍ نومبر 1932ء تک لندن میں منعقد ہوا۔ چوں کہ ہندستانیوں کی طرف سے کوئی متفقہ مطالبہ تیار نہیں ہوسکا، اسی وجہ سے مسلم لیگ اور کانگریس کی شرکت نہ کرنے کی وجہ سے کسی ٹھوس فارمولے پر اتفاق رائے نہ ہو سکا۔اور یہ کانفرنس بھی ناکامی کی شکار ہوگئی۔جمعیت علما نے اس کے انعقاد سے پہلے ہی یکم نومبر 1932ء کو عدم اعتماد کا اظہار کردیا تھا۔
قرطاس ابیض
گول میز کانفرنس کے اختتام پر حکومت برطانیہ نے مختلف کمیٹیوں کی رپورٹوں، سفارشوں اور تجاویز پر مبنی ایک وضاحتی قرطاس ابیض(White Paper) 17؍مارچ 1933ء کو شائع کیا گیا۔ چوں کہ اس میں بھی سابقہ اعلانات کے اعادے کے علاوہ کچھ نہیں تھا، اس لیے بھارتیوں نے بالکل بھی قبول نہیں کیا اور بھارت کی مکمل آزادی کے لیے سول نافرمانی کی ڈگر پر چلتے رہے۔24؍مارچ 1933ء کو حضرت مولانا احمد سعید صاحب ناظم عمومی جمعیت علمائے ہند نے اس پر رد عمل ظاہر کرتے ہوئے فرمایا کہ جن لوگوں کا مسلک مکمل آزادی ہے، ان کو کسی وائٹ پیپر سے کوئی تعلق نہیں ہے۔بعد ازاں 19تا 21؍ اگست 1933ء کو منعقد مجلس عاملہ نے جمعیت علمائے ہند نے اس نظریے پر مہر تصدیق ثبت کردی۔
پارلیمنٹری کمیٹی کی رپورٹ وائٹ پیپر سے بھی بدتر
23؍نومبر1934ء کو جوائنٹ پارلیمنٹری کمیٹی کی رپورٹ شائع کی گئی، جس پر اپنا رد عمل ظاہر کرتے ہوئے یکم دسمبر 1934ء کو جمعیت نے اسے قرطاس ابیض سے بھی بد تر قرار دے کر مسترد کردیا۔
مرکزی قانون ساز اسمبلی کا الیکشن
قرطاس ابیض اور مشترکہ پارلیمانی کمیٹی کی رپورٹ کے تناظر میں انڈیا ایکٹ 1935ء نافذ کیا جانے والے تھا۔اس ایکٹ کی رو سے جوکچھ بھی خود مختاری ہندستان کو مل رہی تھی، اس سے فائدہ اٹھانے کے لیے مسلم لیگ اور کانگریس دونوں نے الیکشن میں حصہ لینے کا فیصلہ کیا۔ جمعیت علمائے ہند نے5؍نومبر1934ء کو مسلم یونٹی بورڈ کے امیدواروں کی مشروط حمایت کی۔
اواخر دسمبر1934ء تک مرکزی اسمبلی الیکشن کے نتائج سامنے آگئے
انڈیا ایکٹ 1935ء کی مخالفت
اس کے بعد 24؍جنوری 1935ء کو ایک میمورنڈم اور یکم فروری 1935ء کا انڈیا بل 1935ء کو شائع کیا گیا۔جس کی 24؍جون 1935ء کو پرزور مذمت کرتے ہوئے جمعیت علما نے اسے قبول نہ کرنے کا اعلان کیا۔بعد ازاں کئی ماہ کی مسلسل بحث وگفتگو کے بعد2؍ اگست 1935ء کو گیارہ بج کر چالیس منٹ پر ملک معظم نے انڈیا بل پر مہر تصدیق ثبت کردی۔ اس طرح برطانوی شہنشاہ نے اپنے نزدیک ہندستان کو آزادی دے دی اورانڈیا ایکٹ 1935ء کو آخری شکل میں منظور کر لیا۔
چوں کہ اس میں مکمل آزادی کے مطالبہ کو شامل نہیں کیا گیا تھا، اس لیے17؍جنوری 1936ء کو جمعیت علمائے ہند نے ایک عظیم الشان اجلاس کے ذریعہ اس ایکٹ کی شدید مخالفت کی۔
صوبائی انتخابات
انڈیا ایکٹ 1935ء کی رو سے جو بھی صوبائی خود مختاری ہندستان کو مل رہی تھی، اس سے فائدہ اٹھانے کے لیے ہر پارٹی نے الیکشن میں حصہ لینے کا فیصلہ کیا۔مسلمانوں کی طرف سے متحدہ پلیٹ فارم سے الیکشن میں حصہ لینے کے لیے 2؍اپریل 1936ء کو منعقد مسلم یونٹی بورڈ میں یہ فیصلہ کیا گیا کہ مسلم لیگ کے بجائے اس بورڈ کے بینر تلے الیکشن لڑا جائے۔بعد ازاں 26؍ اپریل1936ء میں جمعیت علمائے ہند نے اس الیکشن میں مسلم لیگ کی حمایت کا اعلان کیا۔
الیکشن کے نتائج
جنوری 1937ء سے الیکشن کا آغاز ہوا اور ہندستان کے کل گیارہ صوبوں میں انتخابات ہوئے۔ اس انتخاب میں جمعیت علمائے ہند نے بہار میں مسلم انڈی پینڈنٹ پارٹی کی، یوپی میں مسلم لیگ کی اور صوبہ سرحد اوردیگر ریاستوں میںکانگریس کی حمایت کی۔ اورمختلف صوبوں کا دورہ کرکے حمایت کردہ پارٹی کے امیدواروں کے حق میں ووٹ دینے کی تحریک چلائی۔ چوں کہ یہ الیکشن جداگانہ انتخاب کے اصول پر مبنی تھا، اس لیے مسلم لیگ نے مسلم حلقوں میں اور کانگریس نے اپنے ہندو مسلم حلقوں میں زبردست کامیابی حاصل کی، جس کی وجہ سے بعض کانگریسی لیڈروں نے کامیابی کے زعم میں یہ بیان دینا شروع کردیا کہ حکومت سازی میں مسلم لیگ سے تعاون کی ضرورت نہیں، اس پر جمعیت علما نے تنبیہ کرتے ہوئے 13؍مارچ 1937ء کو گاندھی جی سے ملاقات کی اور اس فکر کو قومی یک جہتی کے لیے سم قاتل قرار دیا۔
یکم اپریل 1937ء سے انڈیا ایکٹ 1935ء کو نافذ العمل قرار دیا گیا۔ اس طرح ہندستانیوں کو آئینی آزادی کی پانچویں قسط ملی۔ جمعیت علما نے اس سے پہلے ہی 24؍مارچ 1937ء کویوم نفاذکو یوم مخالفت آئین کے طور پر منانے کا اعلان کیا۔
قبول اور عدم قبول وزارت کا مسئلہ
چوں کہ انڈیا ایکٹ 1935ء میں کل اختیارات انگریز گورنروں کو دیے گئے تھے، اس لیے انتخاب میں بھاری کامیابی کے باوجود کانگریس نے وزارت قبول نہ کرنے کا فیصلہ لیا، گاندھی جی نے مشورہ دیا کہ گورنروں سے عدم مداخلت کی تحریر لینے کے بعد وزارت قبول کریں؛جب کہ اس کے برعکس جمعیت علما نے 24؍مارچ 1937ء کویہ فیصلہ کیا کہ بلا شرط وزارتیں قبول کی جائیں ، جسے بعد میں کانگریس نے بھی تسلیم کیا اور حکومت سازی کی۔
مسلم لیگ سے جمعیت علما کی علاحدگی
5؍ اپریل 1936ء کو ایک میٹنگ میں فیصلہ کرنے کے بعد 26؍اپریل 1936ء کو اکابرین جمعیت نے مسلم لیگ پارلیمنٹری بورڈ کی رکنیت قبول کی تھی؛ لیکن مسٹر جناح کی اسلام مخالف پالیسی، فرقہ وارانہ خطوط پر جداگانہ انتخاب کے مطالبہ اور مکمل آزادی کی حمایت نہ کرنے کی وجہ سے 17؍ مئی 1937ء کو الٰہ آباد نیشنلسٹ کانفرنس میںبشمول جمعیت علمائے ہند تمام مسلم جماعتوں نے متفقہ طور پر کانگریس میں شرکت کا فیصلہ کرتے ہوئے مسلم لیگ کی رکنیت سے استعفی دے دیا۔
کانگریس، لیگ اتحاد کی کوشش اور کانگریس میں شرکت کا اعلان عام
جب پنڈت جواہر لال نے الیکشن میں ملی کامیابی کے زعم میں یہ کہہ دیا کہ ملک میں صرف دوہی جماعتیں ہیں: کانگریس اور گورنمنٹ ، تو مسٹر جناح کو اُن سے شکایت پیدا ہوگئی اور انھوں نے جواب میں اعلان کیا کہ ملک میں ایک تیسری جماعت مسلم لیگ بھی ہے۔یہ بدمزگی کی بنیاد تھی۔ اسی طرح مسلم اقلیت کے تعلق سے کانگریس کی پالیسی واضح نہ ہونے کی وجہ سے مسلم لیگ اور کانگریس میں مزید دوریاں پیدا ہوگئیں۔ جمعیت علمائے ہند نے دونوں میں دوریاں ختم کرنے کی انتھک کوششیں کیں۔ البتہ ملک کی آزادی کی خاطر کانگریس کے ساتھ اشتراک عمل کے فیصلہ پر قائم رہنے کا اعلان کیا۔
(جلدسوم)
متحدہ قومیت کا مسئلہ
7؍جنوری 1938ء کو حضرت شیخ الاسلام کی تقریر کے ایک جملہ ’’قومیں اوطان سے بنتی ہیں، نسل، یا مذہب سے نہیں‘‘ سے متحدہ قومیت اور وطنیت کے موضوع پر بحث کا ایک لامتناہی سلسلہ چھڑگیا۔ علامہ اقبال کے ایک قطعہ نے اس اختلاف کو اور بڑھکا دیا، جس سے نظریۂ پاکستان کے لیے بحث کا دروازہ کھل گیا۔
مسلم لیگ کا مصالحت سے انکار
9؍جنوری1938ء کو صدرمسلم لیگ مسٹر جناح کو ایک تار بھیج کر یہ مشورہ دیا گیا کہ 3؍ جنوری1938ء کو منعقد کانگریس کے اجلاس میں ہندو مسلم سمجھوتہ کے لیے مسٹر جناح کو مصالحت کی دعوت فیصلے کے تناظر میں بہتر ہے کہ پہلے مسلم کنونشن کرلیا جائے؛ لیکن صدر لیگ نے اس مشورہ کو ٹھکرا دیا ؛ اس کے باوجود ہندستان کی مکمل آزادی ، فرقہ وارانہ ہم آہنگی اور مسلم حقوق کے تحفظ کے لیے مسلم لیگ اور کانگریس میں مصالحت کرانے کی کئی کوششیں کی گئیں؛ لیکن لیگ کے بے جا مطالبات کی وجہ سے ساری کوششیں رائیگاں ہوگئیں۔
فوجی بھرتی بل کی مخالفت
ہونے والی جنگ عظیم دو م کے لیے فوجی بھرتی کے لیے لائے گئے بل کی مخالفت کرتے ہوئے یکم ستمبر1938ء کو جمعیت علما نے اپیل کی کہ نوجوان اس میں بالکل بھی حصہ نہ لیں۔
آرمی بل کے تحت ہندستانیوں کو فوج میں بھرتی کرنے کے خلاف مجلس احرار اسلام کے کارکنان نے پنجاب میں تحریک چھیڑ رکھی تھی، جس پر حکومت ڈیفنس ایکٹ کے تحت اس کے کارکنان کو اندھا دھند گرفتار کر رہی تھی، مجلس عاملہ منعقدہ 3،4؍ مارچ1940ء نے اس پر ایکشن لیتے ہوئے حکومت پنجاب کی سرزنش کی ۔
فیڈریشن قبول نہ کرنے کا اعلان
8-9؍اکتوبر1938ء کو مسلم لیگ نے ہندستان کو دو حصوں: مسلم حکومتوں کی فیڈریشن اور غیر مسلم حکومتوں کی فیڈریشن میں تقسیم کرنے کا مطالبہ کیا۔بعد ازاں اس نظام سے جمہوریت کے پردے میںاکثریتی طبقہ کو فائدہ پہنچنے کی دلیل دے کر اس کی مخالفت کی، جس سے برطانوی حکومت ہند کومرکزی اسمبلی انتخابات نہ کرانے کا بہانہ مل گیا اور اس طرح سیاسی فضا میں جمود طاری ہوگیا۔ اس سلسلے میں جمعیت علمائے ہند کا یہ موقف تھا کہ فیڈریشن برطانوی ہندی تعلقات کا نقطۂ انکسار ہے، اور یہ اس وقت تک قابل قبول نہیں ہوسکتا، جب تک کہ انڈیا ایکٹ کی دفعہ (۵) کو عملہ جامہ نہ پہنادیا جائے۔
جنگ عظیم دوم میں شرکت کی مخالفت کا فیصلہ
3؍ ستمبر1939ء سے دوسری عالمی جنگ کا آغاز ہوا، جس میں برطانوی ہند نے ہندستانیوں سے مشورہ کیے بغیر جنگ میںبھارت کی شمولیت اعلان کردیا۔ اس کے خلاف 14؍ ستمبر 1939ء کو کانگریس نے اور 16تا 18؍ ستمبر1939ء کو جمعیت علمائے ہند نے طویل غورو فکر کے بعد یہ فیصلہ کیا کہ اپنی محکومیت کی عمر بڑھانے کے لیے ہم ہرگز جنگ میں شرکت نہیں کریںگے۔ اور برطانی ہند کے خلاف عملی طور پر مظاہرہ کرتے ہوئے 31؍ اکتوبر1939ء تک کانگریسیوں نے وزارت سے استعفے دے دیے۔ جب کہ قادیانیوں اور مسلم لیگ نے جنگ میں برطانوی ہند کی حمایت کی اور وزارت کے استعفیٰ کو اپنے لیے ایک موقع سمجھتے ہوئے 22؍ دسمبر 1939ء کو ’’یوم نجات ‘‘ منانے کا اعلان کیا۔ چوں کہ اس سے فرقہ وارانہ فسادات بھڑک اٹھنے اور ہندستان کی آزادی سے مسلمانوں کی بیزاری کا اظہار ہوتا تھا، اس لیے مولانا ابوالکلام آزادؒ اور دیگر مسلم لیڈروں نے مسلم لیگ کے اس رویہ کو تباہ کن قرار دیا۔
13؍جنوری 1940ء کو حضرت مولانا ابوالمحاسن محمدسجاد صاحب نے وائسرائے ہند کو ایک طویل مکتوب لکھ کر واضح کردیا کہ ہم اپنی غلامی کی زندگی کو دراز کرنے کے لیے برطانیہ کے ساتھ جنگ عظیم دوم میں شرکت نہیں کریں گے۔
علاوہ ازیں جنگ عظیم دوم میں ہندستانیوں کا تعاون حاصل کرنے کے لیے حکومت نے لچک رویہ اختیار کرتے ہوئے 8؍ اگست 1940ء کوہندستان کے کچھ نمائندہ لیڈروں کو اپنی ایگزیکیٹو کونسل میں شامل کرنے اور جنگ کے بعدمشاورتی کونسل قائم کرنے کی پیش کش کی۔ چوں کہ دوران جنگ قومی گورنمنٹ، یا بااختیار کیبنٹ کا فیصلہ نہیں کیا گیا تھا، اس لیے کانگریس نے بھی اسے تسلیم کرنے سے انکار کیا اور 12؍ اگست 1940ء کو ناظم عمومی جمعیت علمائے ہند ابوالمحاسن حضرت مولانا محمد سجاد صاحبؒ نے ایک اخباری بیان جاری کرتے ہوئے کہا کہ جمعیت علما اس طرح کی کسی بھی پیش کش کو قبول کرنے کے لیے تیار نہیں، جس میںہمارے فطری حق، یعنی مکمل آزادی کو تسلیم نہ کیا گیا ہو۔
اسی طرح تعاون کی پیشکش پر حکومت برطانیہ کی طرف سے لالچ دینے کو وعدۂ محبوب بتاتے ہوئے اعلان کیا کہ اس جنگ سے ہمارا کوئی تعلق نہیں ہے۔
29و 30؍ ستمبر و یکم و2؍ اکتوبر 1940ء کو منعقد مجلس عاملہ کی آخری تجویز میں جمعیت علمائے ہند نے حکومت کے تعاون کو ناجائز قرار دیتے ہوئے مکمل آزادی کے لیے جدوجہد جاری رکھنے کا اعلان کیا۔
قرارداد پاکستان کی متحدہ مخالفت
برطانیہ نے ہندستان سے جنگ عظیم دوم کے درمیان امداد و تعاون کی خواہش کا اظہار کیا، جس پر جمعیت اور کانگریس نے مکمل آزادی، اور مسلم لیگ نے مذہبی خطوط پر وطن کو تقسیم کرنے اور مسلم لیگ کو مسلمانوں کی واحد نمائندہ تنظیم تسلیم کرنے کی شرط رکھی۔ حکومت نے ان مطالبات کو مسترد کرتے ہوئے کہا کہ دونوں بڑی اکثریتی قومیں اگر متحدہ آواز سے کوئی بات کہیں، تو حکومت ہند اس پر غور کرے گی۔ چنانچہ اس کے لیے 3،4؍ مارچ1940ء کو جمعیت نے مجلس عاملہ کے اجلاس میں آل پارٹیز آزاد مسلم کانفرنس کی داعی ہونے کا فیصلہ لیا۔
بعد ازاں 23؍ مارچ1940ء کو آل انڈیا مسلم لیگ کا تاریخی اجلاس لاہور کے منٹو پارک میں محمد علی جناح کی صدارت میں منعقد ہوا۔ اس میں وفاق سے گریز اختیار کرتے ہوئے ایک قرار داد منظور کی، جو بعد میں’’ قرار داد پاکستان‘‘ کے نام سے مشہور ہوئی۔ اس میں مسلمانوں کی آبادی کی اکثریتی متصل علاقوں پر مشتمل ہندستان کے شمال مغرب اور مشرق میں آزاد خود مختار ریاستوں کے قیام کا مطالبہ کیا گیا تھا۔اس پر سب سے زیادہ خوشی برطانوی حکومت کو ہوئی؛ کیوں کہ اسے کانگریس کے مقابلے پر ایک مؤثر ہتھیار مسلم لیگ کی صورت میں ہاتھ لگ گیا تھا۔
اسی قرارداد پاکستان کے خلاف ہندستانی مسلمانوں کی طرف سے متفقہ آواز اٹھانے کے لیے،بشمول جمعیت علمائے ہند،نو مسلم سیاسی جماعتوں نے 27؍تا 30؍اپریل 1940ء کو دہلی میں آل پارٹیز آزاد مسلم کانفرنس کرکے نظریۂ پاکستان کو مسترد کرتے ہوئے ہندستان کی مکمل آزادی کا مطالبہ دہرایا۔
مسٹر جناح نے حضرت امام الہند کی توہین کی
12؍ جولائی 1940ء کو کانگریس کے صدر مولانا ابوالکلام آزادؒ نے مسٹر جناح کو ایک تار بھیج کر یہ مطالبہ کیا تھاکہ ملک اور قوم کے بہترین مفاد پر مشتمل آزاد ہندستان کا دستور مرتب کرنے میں تعاون کریں ؛ لیکن مسٹر جناح نے اس میں نہ صرف تعاون نہ کرنے کا جواب دیا؛ بلکہ تار کے جواب میں جو زبان اور لہجہ استعمال کیا، اس پر آزاد قومی صحافت، سنجیدہ لیگی حلقوں اور جمعیت علمائے ہند نے اپنی سخت ناپسندیدگی کا اظہار کیا۔
انفرادی ستیہ گرہ
ہندستان کے وائسرائے لارڈ لن لتگھونے بھارتیوں کی رائے لیے بغیرجرمنی کے خلاف دوسری عالمی جنگ میں ہندستان کی شمولیت کا اعلان کردیا، اسی طرح ڈیفینس آف انڈیاایکٹ 1939ء پاس کرتے ہوئے اظہار رائے کی آزادی پر پابندی لگادی،جس سے پورا بھارت انگریزوں کے خلاف مشتعل ہوگیا۔ اس کے خلاف جب کانگریس نے 11؍ اکتوبر 1940ء کوانفرادی ستیہ گرہ تحریک کے پہلے مرحلے کا آغاز کیا، تو جمعیت علمائے ہندنے اس میں بڑھ چڑھ کر حصہ لیا اور نظم وضبط قائم رکھنے کے لیے مجلس عاملہ منعقدہ:5،6؍ جنوری 1941ء میں دس نکاتی ہدایات جاری کیں۔یہ مرحلہ 14؍ دسمبر 1940ء کو اختتام پذیر ہوا۔اوردوسرا مرحلہ: جنوری 1941ء میں شروع ہوا اور دسمبر 1941ء میں اختتام پذیر ہوا۔
کرپس اسکیم کا حشر
ادھرایک طرف جاپان جرمنی کا ساتھ دیتے ہوئے جنگ میں کود پڑا، تو وہیں دوسری طرف آزادی ہند فوج نے بھی امپھال کا محاصرہ کرکے ’’چلو چلو دلی چلو‘‘ کا نعرہ دیا، جس نے ہندستان میں انگریز حکومت کی بنیادیں ہلاکر رکھ دیں۔علاوہ ازیںمکمل آزادی کے نعرے کے ساتھ سول نافرمانی کی تحریک نے حالات کو اوردھماکہ خیز بنادیا۔ ان حالات کے پیش نظر حکومت برطانیہ نے 11؍ مارچ 1942ء میں اسٹفرڈ کرپس(Stafford Cripps) کو،تمام اہم سیاسی پارٹیوں کے لیڈران اور والیان ریاست کے نمائندوں سے گفتگو کرنے کے لیے ہندستان بھیجا۔ کرپس نے 29؍ مارچ 1942ء کو اپنی تجویز پیش کردی۔چوں کہ اس میں ہندستان کی مکمل آزادی کا تذکرہ نہیں تھا، اس لیے کانگریس نے اس کو کلیتاً مسترد کردیا اور فوری طور پر ملک میں خود مختار حکومت تشکیل دینے کا مطالبہ کیا۔ مسلم لیگ نے بھی کرپس مشن کویہ کہہ کرقبول کرنے سے انکارکردیا کہ اس میں مسلمانوں کے لیے ایک علاحدہ مملکت کے قیام کے لیے کوئی ٹھوس ضمانت نہیں دی گئی ہے۔جمعیت چوں کہ انگریزوں کی عیارانہ فطرت سے بہ خوبی واقف تھی، اس لیے کرپس کی تجویز پیش کرنے سے پہلے ہی 20/21/22؍ مارچ1942ء کواپنے تیرھویںاجلاس عام میں اس مشن کو مسترد کردیا، جس سے اس کو ناکامی کا منھ دیکھنا پڑا۔
ہندستان چھوڑ دو تحریک
جب کرپس مشن ناکام ہوگیا، توچرچل نے 12؍ اپریل 1942ء کو اسے لندن واپس بلالیا اور وائسرائے ہند لن لتھگوکو حکم دیا کہ وہ بھارتیوں کی تحریک آزادی کو ظلم و تشدد سے کچل ڈالے۔ چنانچہ لن لتھگو نے ہندستانیوں پر ظلم و ستم کا پہاڑ توڑنا شروع کردیا اور داروگیر کی رفتار بڑھادی، جس سے عاجز آکر گاندھی جی نے کرو یا مرو کا نعرہ دیااور 14؍ جولائی 1942ء کو کانگریس کی مجلس عاملہ نے’’ہندستان چھوڑ دو‘‘ تحریک(Quit India Movement ) کی تجویز پاس کی۔بعد ازاں7؍ اگست 1942ء کواپنے مجلس عاملہ کے اجلاس میں اس قرارداد کی تصدیق کرتے ہوئے 8؍ اگست 1942ء کو عملی طور پر تحریک کا آغاز کردیا،جس سے پورے ہندستان میں بھونچال آگیا۔انگریزوں نے کانگریس اور جمعیت علمائے ہند کے رہ نماؤں کو گرفتار کرنا شروع کردیا؛ حتیٰ کہ کانگریس کے صدر مولانا ابوالکلام آزاد ؒ، گاندھی جی اور دیگر بڑے رہ نماؤں کو9؍ اگست 1942ء کو ہی گرفتار کرلیا۔ اسی طرح جمعیت علما نے 17-18؍ اگست 1942ء کومجلس عاملہ کا اجلاس کیا، جس میں جنگ آزادی میں مسلمانوں کے کردار کے اعلان پرمبنی تجویز پاس کرکے اس کوہندستان کے گو شے گوشے میں پھیلادیا، جس کے نتیجے میںاس کے قائدین بھی تختۂ مشق ستم بنائے گئے اور شیخ الاسلام، مجاہد ملت اور سید الملت سمیت درجنوں شخصیات کو پابند سلاسل کردیاگیا، جس سے حالات مزید دھماکہ خیز ہوگئے۔ اس کے بالمقابل مسلم لیگ نے ہندستان چھوڑ دو تحریک کو بغاوت قرار دیتے ہوئے مسلمانوں سے اپیل کہ وہ اس تحریک سے لاتعلق رہیں؛ مگر مسلمانوں نے مسلم لیگ کی اپیل کو مسترد کرتے ہوئے، ہندستان آزاد ہونے تک تحریک جاری رکھنے کا اعلان کیا۔
گاندھی جی نے ایام اسیری میں بھی ہندستان کی آزادی کے قابل قبول حل نکالنے کے لیے فروری 1943ء تک خط و کتابت کرتے رہے؛ لیکن وائسرائے ہند لن لتھ گو ٹس سے مس نہ ہوا۔ بالآخر گاندھی جی نے آخری ہتھیار کے طور پر 10؍فروری سے 3؍ مارچ 1943ء تک اکیس روز کا برت رکھا۔ برت کے اختتام کے موقع پرحضرت مولانا احمد سعید صاحب ؒ نائب صدر جمعیت علمائے ہندنے ایک صلح کانفرنس کی قیادت کی، جس کی وجہ سے آپؒ کو گرفتار کرلیا گیا۔
راجا فارمولا
قرارداد پاکستان کے بعد انڈین نیشنل کانگریس اور آل انڈیا مسلم لیگ کے درمیان مصالحت کرانے کی کئی کوششیں کی گئیں۔ چنانچہ اسی مقصد سے مسٹر راج گوپال آچاریہ سابق وزیر اعظم صوبہ مدراس نے 10؍اپریل 1944ء کو ایک فارمولا مرتب کرکے مسٹر جناح کے پاس بھیجا،جو ’’راجا فارمولا‘‘ کے نام سے مشہور ہوا، لیکن 30؍جولائی 1944ء کو مسٹر جناح نے یہ کہہ کر مسترد کردیا کہ ’’یہ محض سایہ، چھلکا، پوپلا، لنگڑا، اپاہج اور کرم خردہ پاکستان ہے۔‘‘
سپرو کمیٹی کی سفارشات
جنگ عظیم دوم (یکم ستمبر1939ء-2؍ ستمبر1945ء) کے دوران برطانوی حکومت ہند نے ہندستان کے آئینی مسائل حل کرنے کے بجائے بالکل خاموشی اختیار کرلی۔اسی آئینی جمود و تعطل کو ختم کرنے،اورہندستان کو فرقہ وارانہ خطوط پر تقسیم کے مطالبے کو مد نظر رکھتے ہوئے غیر جماعتی کانفرنس کی اسٹینڈنگ کمیٹی کی طرف سے23؍جنوری 1945ء کو’’سپرو کمیٹی کی سفارشات‘‘ پیش کی گئیں۔ چوں کہ سپرو کمیٹی میں حق خود ارادیت کی کلیتا نفی، دستور ساز اسمبلی میں اچھوتوں کے لیے جداگانہ نیابت کا استحقاق اور آئندہ آزاد حکومت کی تشکیل کی بعض تفصیلات جمعیت علما کے فیصلوں کے خلاف تھیں، اس لیے 31؍جنوری تا 2؍فروری 1945ء کو منعقد مجلس عاملہ کے اجلاس میں اس کی سفارشات کو نامنظور کرتے ہوئے آزاد بھارت کے آئین میں مسلمانوں کی حقیقی پوزیشن واضح کرتے ہوئے 3؍ اگست 1931ء کا ہی کے منظور کردہ فارمولا پیش کیا گیا، جو تاریخ میں ’’جمعیت علما کا فارمولا‘‘ کے نام سے مشہور ہے۔اس فارمولے میں آزادیِ کامل، مسلم مذہب و تہذیب کی آزادی اور صوبوں کی مکمل خود مختاری کی دفعات شامل تھیں۔ علاوہ ازیں اقلیتوں پر اکثریت کے مظالم کی روک تھام کے لیے مرکزی ایوان کے ممبروں کی تعداد میں45؍ فی صد ہندو، 45؍ فی صد مسلم اور 10؍فی صد دیگر اقلیتوں کی سیٹیوں کی تخصیص، سپریم کورٹ میں مسلم و غیر مسلم ججوں کی تعداد کی برابری کے مطالبہ کے علاوہ یہ مطالبہ بھی شامل تھا کہ مرکزی حکومت میں اگر کسی بل، یا تجویز کو مسلم ارکان کی دو تہائی اکثریت اپنے مذہب، یا اپنی سیاسی آزادی، یا اپنی تہذیب و ثقافت پر مخالفانہ اثر انداز قرار دے، تو وہ بل، یا تجویز ایوان میں پیش ،یا پاس نہ ہوسکے گی۔
واویل پلان
وائسرائے ہند لن لتھ گو کی تشدد آمیز حرکتوں کے باوجود بھارتیوں کا جذبۂ آزادی سرد نہیں ہوا، تو حکومت برطانیہ نے یکم اکتوبر 1943ء میں واویل کو ہندستان کا وائسرائے بناکر بھیجا ۔ واویل نے ہندستان کے مسائل حل کرنے کے لیے واویل پلان(Wavell Plan) پیش کیا۔اس پلان کے مطابق بھارت میں عارضی حکومت قائم کرنے کے لیے مختلف مذاہب کے لیڈروں پر مشتمل چودہ افراد کی ایک ایگزی کیٹو کونسل (Executive Council)تشکیل دینا تھا۔ جمعیت نے اس پلان پر غوروخوض کے لیے 28؍ جون 1945ء کو مجلس عاملہ کا اجلاس طلب کیا، جس میںدوسری تنظیموں کے لیڈران بھی مدعو تھے۔ اس مشترک اجلاس میں ہندستان کے آئینی مسئلے کے حل ہونے کی امید پر یہ فیصلہ لیا گیا کہ واویل پلان عارضی وقت کے لیے مناسب ہے۔
واویل پلان کے مطابق ایگزی کیٹو کونسل کے 14؍ممبران کے لیے چھ نام کانگریس کو ، پانچ نام مسلم لیگ کو اور تین نام دیگرفرقوں کی طرف سے پیش کیے جانے تھے۔ حضرت مولانا ابوالکلام آزادؒ کے حسن تدبر سے کانگریس نے اپنے کوٹے کو اس طرح تقسیم کیا تھا کہ اعلا ہندو تین، سکھ ایک، اچھوت ایک، مسلمان ایک۔اس کونسل کے لیے مسلم کو منتخب کرنے کا مسئلہ درپیش ہوا، تو کانگریس کے صدر حضرت مولانا ابوالکلام آزاد صاحبؒ کی دعوت پر3،4؍ جولائی 1945ء کوحضرت مولانا حسین احمد مدنی صاحب ؒصدر جمعیت علمائے ہند اورناظم عمومی حضرت مولانا محمد حفظ الرحمان صاحبؒ شملہ تشریف لے گئے اور ناموں کے انتخاب میں کانگریس کی رہ نمائی کی۔ کانگریس نے نام پیش کردیے؛ مگر مسلم لیگ نے اس بات پر اصرار کرتے ہوئے نام پیش کرنے سے انکار کردیا کہ کانگریس ہندوؤں کی جماعت ہے، اس لیے اسے مسلمان ممبروں کو نام زد کرنے کا حق نہیں ہے۔یہ حق صرف مسلم لیگ کو ہے؛ کیوں کہ وہی مسلمانوں کی واحد نمائندہ تنظیم ہے۔ اس بے جا اصرار کی وجہ سے 14؍ جولائی 1945ء کو کانفرنس کی ناکامی کا اعلان کردیا گیا۔
مسلم پارلیمنٹری بورڈ کا قیام
19؍ ستمبر1945ء کو وائسرائے ہند واویل نے اعلان کیا کہ دسمبر 1945ء سے جنوری 1946ء کے درمیان مرکزی اور صوبائی لیجس لیٹیو کونسل کے انتخابات ہوںگے۔ساتھ ہی یہ بھی اعلان کیا کہ انتخابات کے بعد ایک ایگزی کیٹو کونسل تشکیل دی جائے گی اوراس کے بعد آئین سازی کے لیے اجلاس بلایا جائے گا۔
اس اعلان کے بعد جمعیت نے آزاد ہندستان میں دین و ملت کی آزادی، شریعت غرہ کے تحفظ، مسلمانوں کے باعزت مقام اور ان مقاصد کو حاصل کرنے کے لیے آئندہ انتخابات میں علمائے کرام کی قیادت و شرکت کے حوالے سے غوروخوض کے لیے، مختلف مسلم تنظیموں اور لیڈروں پرمشتمل16تا 19؍ستمبر 1945 ء کو ’’مسلم آل پارٹیز کانفرنس‘‘ بلائی ، جس میں انتخابا ت میں مشترک طور پر حصہ لینے کے لیے متفقہ طور پر ’’مسلم پارلیمنٹری بورڈ‘‘ تشکیل دی گئی۔اور حضرت شیخ الاسلام ؒ کو بورڈ کا صدر منتخب کیا گیا۔بورڈ نے ہندستان کی مکمل آزادی اور جمہوریت کے نام پر ووٹ کی اپیل کی، جب کہ مسلم لیگ نے اسلامی مملکت کا دھوکہ دے کر حصول پاکستان کے نام پر ووٹ مانگا۔ لیگیوں نے الیکشن جیتنے کے لیے جمعیت کے رہ نماؤں؛بالخصوص حضرت شیخ الاسلامؒ، حضرت مجاہد ملتؒ،حضرت امام الہندؒ اوردیگر قومی قائدین کے ساتھ بد تمیزیوں کی انتہا کردی؛ حتیٰ کہ انھیں جان سے مارنے کی بھی کوششیں کیں۔لیکن یہ نڈر مجاہدین وطن و ملت اپنے مشن سے ایک انچ بھی پیچھے نہ ہٹے ۔لیگیوں نے فتوؤں کا بھی سہارا لیا اور پاکستان کی مخالفت کرنے والوں کو اسلام اور مسلمان کا دشمن قرار دیتے ہوئے، دائرۂ اسلام سے خارج کا حکم بھی صادر کرایا گیا۔
مرکز، صوبائی اور آئین ساز اسمبلی الیکشنز کے نتائج
آواخر دسمبر1945ء تک مرکزی قانون ساز اسمبلی کی 102 ؍نشستوں پر ہوئے الیکشن کے نتائج سامنے آگئے۔یہ الیکشن جداگانہ طریقۂ انتخاب پر مبنی تھا، یعنی مسلمان مسلمانوں کو ووٹ دیں گے اور ہندو ہندوؤں کو۔ مسلم لیگ نے پاکستان کے نعرے کے ساتھ الیکشن لڑا ، جب کہ جمعیت علمائے ہند نے آزادی ہند کے نام پرمسلم پارلیمنٹری بورڈ کے تحت کانگریس کی حمایت کی۔ اس میں 30؍ نشستیں مسلمانوں کے لیے مخصوص تھیں،ان سب نشستوں پر مسلم لیگ نے جیت درج کرالی، جب کہ کانگریس کو کل 57؍نشستیں ملیں۔
اس کے بعد فروری اورمارچ 1946ء میںصوبائی اسمبلیوں کی کل1585 ؍نشستوں پر الیکشن ہوئے۔ان میں کانگریس نے کل 923؍ سیٹوں پر(%58.23) جیت درج کرائی۔ جب کہ آل انڈیا مسلم لیگ نے مسلمانوں کے لیے مخصوص کل 492؍سیٹوں میں سے 425؍ (%26.81) نشستیں جیت کر دوسرے درجہ کی جماعت کا مقام حاصل کرلیا۔
اسی طرح آزاد ہندستان کے لیے آئین تیار کرنے کے لیے پہلی دستور ساز اسمبلی (Constituent Assembly) میں کل 389؍ نشستیں تھیں، جن میں سے 292؍ نشستیں برطانوی ہند کے صوبوں کے لیے اور 93؍ نشستیں دیسی ریاستوں کے لیے تھیں۔ دیسی ریاستوں کے نمائندوں کا انتخاب وہاں کے حکمرانوں کی مرضی سے ہوتا تھا۔جو نشستیں برطانوی ہند کے لیے مخصوص تھیں،اور جن پر صوبائی اسمبلیوں کے منتخب اراکین نے ووٹ دیے،ان پر جولائی 1946ء میں الیکشن ہوئے، جن میں کانگریس نے 207؍ نشستوں (کچھ ذرائع کے مطابق 208) اور مسلمانوں کے لیے مخصوص 78؍ نشستوں میں سے مسلم لیگ نے 73؍ نشستوں پر ،اس کے علاوہ دیگر پارٹیوں اور آزاد امیدواروں نے 28؍ نشستوں پر جیت درج کرائی۔ان تینوں انتخابات میں مسلم لیگ کی نمایاں جیت نے پاکستان کا راستہ کھول دیا۔
انڈین نیشنل آرمی کے سپاہیوں کی رہائی کا مطالبہ
حصول آزادی ہند کے لیے مسٹر سبھاش چندر بوس کی قیادت میں انڈین نیشنل آرمی کی تشکیل دی گئی، جس کا طریقۂ کار بذریعۂ جنگ و تشدد انگریزوں کو دیس نکالا دینا تھا۔ دوسری بڑی جنگ کے خاتمہ کے بعد انگریز حکومت ہند کی طرف سے آزادی وطن کے لیے لڑنے کے جرم میں انھیں پھانسی، عمر قید اور مقدمہ چلانے کا فیصلہ کیاگیا۔ جن کے خلاف صدائے احتجاج بلند کرتے ہوئے جمعیت علمائے ہند نے اپنی مجلس عاملہ منعقدہ18-19؍ستمبر1945ء کو آرمی کے تمام سپاہیوں کو بلاکسی سزا کے رہا کرنے کا مطالبہ کیا۔
کیبنٹ مشن (وزارتی مشن)
انتخابات کے بعد حکومتی اختیارات منتقل کرنے کے لیے 17؍ فروی1946ء کو کیبنٹ مشن (Cabinet Mission) بھیجنے کا اعلان ہوا۔ 23؍ مارچ 1946ء کو کیبنٹ مشن ہندستان پہنچا اور کانگریس، لیگ اور دیگر لیڈروں سے صلاح و مشورے شروع کیے، لیکن اس نے جمعیت علمائے ہندکو مدعو نہیں کیا،جس کے پیش نظر جمعیت نے 28-29؍ مارچ 1946ء کو مجلس عاملہ کے اجلاس میں یہ فیصلہ کیا کہ اگر مسلمانوں کے مفاد کے خلاف کوئی دستوری دفعہ شامل کیا گیا، تو جمعیت اس کی مخالفت کرے گی۔آل انڈیا مسلم لیگ نے مشن سے ملاقات کرتے ہوئے 8-9؍ اپریل 1946ء کو دو آئین ساز ادارے بنانے اور ہندستان کو تقسیم کرنے کا مطالبہ کیا ۔
جمعیت علما کی مجلس عاملہ کے فیصلے کا فوری اثر ہوا اور کیبنٹ مشن نے 16؍ اپریل 1946ء کو ملاقات کے لیے مدعو کیا۔ جمعیت علمانے ملاقات سے ایک دن پہلے 15؍ اپریل 1946ء کو مختلف قوم پرور مسلم جماعتوں کے ساتھ مشترکہ میٹنگ کی اور وزارتی مشن کے سامنے پیش کرنے کے لیے ایک فارمولا تیار کیا۔ اور پھر 16؍ اپریل1946ء کو مجلس عاملہ میں پاس کرکے، اسی دن صدر مسلم پارلیمنٹری بورڈ حضرت مولانا سید حسین احمد مدنی ؒ صدر جمعیت علمائے ہندکی قیادت میں ایک وفد نے کیبنٹ مشن سے ملاقات کی اور فارمولا پیش کیا۔
بعد ازاں مشن نے مسلم لیگ اور کانگریس کے لیڈروں کو تبادلۂ خیالات کے لیے5؍ مئی 1946ء کو شملہ میںمدعو کیا، جس میں دونوں پارٹیوں نے اپنی اپنی تجاویز پیش کیں۔ لیگ کے مطالبۂ پاکستان کے اصرار اور کانگریس کے اکھنڈ بھارت کے دعوے پرقائم رہنے کی وجہ سے یہ کانفرنس ناکام ہوگئی؛ تاہم مشن نے چوبیس نکاتی پلان پیش کیا،جس میںکانگریس کے چھ، مسلم لیگ کے پانچ اور دیگر فرقوں سے تین نام، کل چودہ ناموں پر مشتمل عارضی حکومت کے قیام کا خاکہ تھا۔چنانچہ مسلم لیگ نے 6؍ جون 1946ء کو اور کانگریس نے 25؍ جون 1946ء کو اسے قبول کرتے ہوئے حکومت سازی میں شرکت کی منظوری دی۔اسی درمیان از 10تا 12؍ جون 1946ء کو مجلس عاملہ مرکزیہ کا اجلاس ہوا، جس میں کیبنٹ مشن کی تجاویز کا تنقیدی جائزہ لے کر اپنا واضح موقف پیش کیا۔
ڈائریکٹ ایکشن ڈے اوراس کے خطرناک نتائج
چوں کہ اس خاکہ میں مطالبۂ پاکستان کو یکسر مسترد کردیا گیا تھا، اس لیے لیگی حلقوںکے دباؤ کی وجہ سے مسٹر جناح صدرمسلم لیگ نے 27؍ جولائی 1946ء کو مشن پلان سے بیزاری کا اعلان کردیا اور ساتھ ہی16؍ اگست 1946ء کو ڈائریکٹ ایکشن ڈے مناکر پورے ہندستان میں فرقہ وارانہ فسادات کا لامتناہی سلسلہ شروع کردیا۔
عارضی حکومت کا قیام
ان نازک حالات کے باوجود وائسرائے ہند نے 12؍ اگست 1946ء کو کانگریس کو عارضی حکومت بنانے کی دعوت دی، چنانچہ کانگریس اور دیگر فرقوں نے چودہ میں سے سات ارکان کے ساتھ 2؍ ستمبر 1946ء کو غلام بھارت میں پہلی مرتبہ عارضی حکومت قائم کرتے ہوئے رازداری کا حلف اٹھایا۔
کانگریس کی بے اعتنائی پر تنبیہ اور مکمل نمائندگی کا مطالبہ
چوں کہ مسلم لیگ نے کوئی نام پیش نہیں کیاتھا، تو کانگریس کے پارلیمنٹری بورڈ نے یہ فیصلہ کیا کہ ’’ تا قتیکہ لیگ کی جانب سے کوئی قطعی فیصلہ ہو، ان نشستوں کو عارضی طور پر پر کردیا جائے‘‘۔ چنانچہ کانگریس نے مسلم نشستوں کے لیے مسلم جماعتوں سے مشورہ کیے بغیر از خود سر شفاعت احمد خان اور مسٹر علی ظہیر کو نام زد کردیا۔اور تین نشستیں خالی چھوڑ دیں، جس سے مسلمانوں کی صحیح اور مکمل نمائندگی نہیں ہوسکی۔اس پر جمعیت علمائے ہند نے21تا 24؍ ستمبر1946ء کوایک اجلاس میں انتقال اختیارات کے لیے عارضی قومی حکومت کے قیام پر اطمینان کا اظہار تو کیا ؛ لیکن مسلم لیگ کی غلط قیادت پر افسوس کا اظہار کرتے ہوئے، کانگریس ہائی کمانڈ کے طریق کار پربھی اعتراض ظاہر کیا ۔اور صدر دستور ساز اسمبلی بابو راجندر پرشاد سے مطالبہ کیا کہ مسلمانوں کو صحیح نمائندگی دی جائے۔
مسلم لیگ کی قیادت کی بڑی سنگین غلطی
جب ڈائریکٹ ایکش ڈے منانے کے باوجود مسلم لیگ کو کچھ ہاتھ نہیں آیا، تو 15؍ اکتوبر 1946ء کو عارضی حکومت میں شامل ہونے کا فیصلہ کیا۔لیکن مسلم لیگ نے سب سے بڑی تاریخی غلطی یہ کی کہ مسلمانوں کی واحد نمائندگی کا دعویٰ کرنے کے باوجود کیبنٹ مشن پلان کے مطابق پانچ مسلم ناموں میں ایک نام غیر مسلم دلت لیڈر جوگندر ناتھ منڈل کاشامل کردیا، جس سے وزارتی پلان میں مسلمانوں کی نمائندگی پینتالیس فی صد سے گھٹ کر پینتیس فی صد رہ گئی۔
وزیر اعظم برطانیہ کی طرف سے آزادی کے اعلان کا خیرمقدم، مگر
وزیر اعظم برطانیہ مسٹرایٹلی نے 20؍ فروری 1947ء کو اعلان کیا کہ جون 1948ء تک ہندستان کو آزاد کردیا جائے گا۔ اس اعلان سے پیدا شدہ نازک صورت حال پر غورو خوض کرنے کے لیے 13تا 15؍ مارچ 1947ء کو مجلس عاملہ کا اجلاس کیا گیا، جس کی پہلی تجویز میں مسٹر ایٹلی کے اعلان آزادی کا خیر مقدم کرتے ہوئے ، اسے جمعیت علمائے ہند کی طویل جدوجہد کا نتیجہ قرار دیا۔ دوسری تجویز میں فرقہ وارانہ خطوط پر ملک کی تقسیم کو ملک کے لیے بالعموم اور مسلمانوں کے لیے بالخصوص تباہ کن قرار دیا اور پنجاب کی تقسیم کے لیے کانگریس کی رضامندی پر حیرت کا اظہار کیا گیا۔ تیسری تجویز میںآزاد ہندستان میں مسلمانوں کے مذہبی اور قومی تحفظات کے لیے تمام مسلم جماعتوں کا ایک مشترکہ اجتماع بلانے پر زور دیاگیا۔ اور صدر مسلم لیگ کو دعوت عمل دیتے ہوئے متعدد خطوط لکھے، لیکن مسلم لیگ نے اسے منظور نہیںکیا ۔
ماؤنٹ بیٹن کا پلان
مسٹر ایٹلی وزیر اعظم برطانیہ کے20؍ فروری کے اعلان کے مطابق جلد از جلد مکمل اختیارات ہندستانیوں کو منتقل کرنے کے لیے24؍ مارچ 1947ء کو وائسرائے ویول کی جگہ ماونٹ بیٹن کو ہندستان کا بیسواں اور آخری وائسرائے بناکر بھیجا گیا۔بیٹن نے ہندستان آتے ہی بھارتی لیڈروں کے نظریات اور رائے عامہ معلوم کرنے کے لیے میٹنگوں اور گفت و شنید کا سلسلہ شروع کردیا۔ انھوں نے بالعموم کیبنٹ مشن کو منظور کرلینے کا مشورہ دیااور ساتھ ہی یہ بھی کہا کہ اگر یہ قابل قبول نہیں ہوگا، تو اس کی متبادل صورت بھی موجود ہے؛لیکن مسلم لیگ کا پاکستان کے لیے اصرار کے پیش نظر کیبنٹ مشن پلان منظور نہیں ہوا، تومتبادل کے طور پر ماؤنٹ بیٹن نے تقسیم ہند کا پلان پیش کردیا۔ان حالات کے پیش نظر از 9؍تا 11؍ مئی 1947ء کو لکھنو میں جمعیت علمائے ہند نے مجلس عاملہ اور مجلس مرکزیہ (جنرل کونسل) کا اجلاس کیا، جس کی پہلی تجویز میں مسٹر ایٹلی کے اعلان کا خیر مقدم کیا، لیکن فرقہ وارانہ خطوط پرملک کی تقسیم پر تشویش کا اظہار کرتے ہوئے کیبنٹ مشن پلان کو ہی قبول کرنے کا مشورہ دیا۔اورساتویں تجویز میں دستور ساز اسمبلی میں مسلمانوں کی صحیح نمائندگی دینے کا مطالبہ کیا۔
تقسیم ہند کا پلان اور جمعیت علمائے ہند کا اعلان بیزاری
جب مسلم لیگ نے کیبنٹ مشن کے پلان کو منظور نہیں کیا، تو ماونٹ بیٹن نے ہندستان کی تقسیم کا فارمولہ پیش کیا اور 2؍ جون 1947ء کو سبھی ہندستانی لیڈروں کو بلاکر اسے منظور کرالیا۔ پھر اسے مسلم لیگ نے 9-10؍ جون 1947ء کو ،اور14-15؍ جون 1947ء کو کانگریس نے اپنے اپنے اجلاس میں باقاعدہ منظوری دے دی۔ کانگریس کے اجلاس میں صرف مسٹر پروشتم داس ٹنڈن اور جمعیت علمائے ہند کے ناظم عمومی حضرت مولانا محمد حفظ الرحمان صاحب نور اللہ مرقدہ نے ہی اس تجویز کی مخالفت کی ۔ بعد ازاں 24؍ جون 1947ء کو جمعیت علما نے مجلس عاملہ کا اجلاس کیا،جس میں تقسیم ہند کو مسلمانوں کے لیے سخت نقصان قرار دیتے ہوئے اس سے بیزاری کا اعلان کیا۔
اور ہندستان آزاد ہوگیا
ان تمام کوششوں کے باوجود ہندستان کی تقسیم نہیں رک سکی اور 14؍ اگست 1947ء کو پاکستان ڈومینین کا اور 15؍ اگست 1947ء کو ہندستان کی مکمل آزادی کااعلان کردیا گیا۔
آزادی کی خوشی میں شرکت کا اعلان عام
ہندستان آزاد ہونے پر صرف ان ہی لوگوں کو کوئی خوشی نہیں تھی، جنھوں نے کوئی قربانی پیش نہیں کی تھی،یعنی جن سنگھ،ہندو مہاسبھااور آر ایس ایس سی وابستہ لوگوں کو؛ البتہ جن لوگوں نے اپنی جانی و مالی ہر طرح کی قربانیاں پیش کی تھیں،ان کے لیے یہ بہت اہم لمحہ تھا۔اورچوں کہ جمعیت علما نے انقلاب آمیز قائدانہ کردار ادا کیا تھا، اس لیے ناظم عمومی جمعیت علمائے ہندنے سبھی لوگوں سے دھام دھام سے جشن آزادی منانے کی اپیل کی۔
تقسیم ہند کے بعد کی بھیانک صورت حال
تقسیم ہند کا اعلان صرف نقشے پر کھینچی گئی ایک جغرافیائی لکیر نہیں تھی، بلکہ سینوں پر کھینچی گئی ایک گہری لکیر تھی،جس سے ایک ایسی خون آشام داستان کا آغاز ہوا، جس نے لاکھوں دلوں کو زخمی کر دیا۔ راتوں رات خاندان بٹ گئے، گھر اجڑ گئے اور انسانیت شرمسار ہوئی۔ ٹرینوں میں مسافروں کی جگہ لاشیں تھیں۔ جو کبھی اپنوں سے ملنے کی امید لے کر چلے تھے، وہ اب موت کی علامت بن گئے۔ عورتیں، بچے اور بوڑھے سب اس وحشت کا شکار ہوئے۔ فرقہ وارانہ فسادات نے گاؤں کے گاؤں جلا دیے، نفرت کی آگ نے ہر طرف تباہی مچائی۔ ہندستان اور پاکستان کی سرحدوں پر خون کی ندیوں نے زمین کو سرخ کر دیا۔ انسانیت کی چیخیں فضا میں گونجتی رہیں۔ یہ ایک ایسا وقت تھا جب مذہب، ذات اور قومیت کے نام پر انسان انسان کا دشمن بن گیا تھا۔
تقسیم ہند صرف ایک سیاسی فیصلہ نہ تھا، بلکہ ایک ایسی دل دہلا دینے والی حقیقت تھی، جس نے برصغیر کے لوگوں کے دل و دماغ پر ناقابل فراموش زخم چھوڑے۔ آج بھی وہ درد، وہ چیخیں، اور وہ خون آلود یادیں زندہ ہیں، جو ہمیں بتاتی ہیں کہ نفرت کی قیمت کتنی بھیانک ہو سکتی ہے۔
مسلمانوں کی صحیح رہ نمائی
تقسیم ہند کے انھیں خوف ناک اور بھیانک صورت حال کے پیش نظر ہندستان میں رہ جانے والے پانچ کروڑ مسلمانوں کے قومی و ملکی حقوق کے تحفظ کے لیے28-27؍ دسمبر 1947ء کو لکھنو میں امام الہند مولانا ابوالکلام آزادؒ کی صدارت میں ’’لکھنومسلم کانفرنس ‘‘ بلائی گئی، جس میں سبھی مسلم جماعتوں نے متفقہ طور پران خوں آشام حالات کی ذمہ دار یعنی’’ فرقہ وارانہ پارلیمانی سیاست‘‘سے علاحدگی کا اعلان کرتے ہوئے، جمعیت علمائے ہند نے اپنا دائرۂ عمل تعمیری، تعلیمی اور تہذیبی دائرے تک محدود کرنے کا فیصلہ کیا۔اور شدید فرقہ وارانہ دباؤ کے باوجود جمہوری طرز حکومت اختیار کرنے پر 20-21؍مارچ 1948ء کوانڈین پارلیمنٹ کو مبارک باد پیش کی گئی۔
ہجرت، یا فرار
تقسیم ہند کے شدائد سے پریشان ہوکر کچھ مسلمان ہجرت کے مقدس نام پر ترک وطن کرنے لگے، جس سے کچھ برادران وطن نے غداری کا الزام لگاکر وطن سے وفاداری کا ثبوت طلب کیا۔ چوںکہ پاکستان کوئی اسلامی ملک نہیں تھا، اس لیے جمعیت علما نے مختلف مواقع پرہجرت کے بجائے اسے فرار سے تعبیر کرتے ہوئے جہاں ایک طرف مسلمانوں سے یہ اپیل کی کہ وہ گھبراکر اپنے وطن کو نہ چھوڑیں، وہیںدوسری طرف وفاداری کا ثبوت مانگنے والوں کو کرار جواب دیتے ہوئے بتایا کہ دس فی صدآبادی کو مالی اور تعلیمی معیار کی بنا پر رائے دینے کا حق دیا گیا تھا، یعنی دس کروڑ مسلمانوں میں سے صرف ایک کروڑ کو رائے دینے کا حق حاصل تھا۔لیکن اس کے باوجودتقسیم کی حمایت میںصرف (4,51,156) ووٹ ڈالے گئے تھے، جس کے معنی یہ ہیں کہ دس کروڑ مسلم عوام میں سے صرف ساڑھے چارفی صد نے ہی تقسیم کے حق میں اپنی رائے ظاہر کی۔لہذاساڑھے چار فی صد کی رائے کو کس طرح پوری قوم کے سر تھوپا جاسکتا ہے اور کس طرح اس کی وفاداری، یا غیر وفاداری کا فیصلہ کیا جاسکتا ہے؟
جمعیت علما کا ہاتھ تقسیم ہندکے خون سے پاک ہے
غلامی، تقسیم، تبادلۂ آبادی اور قتل و خوں کی اس طویل داستان وکوہ کن میں دل کو سمجھانے کے لیے، شیخ الاسلام مولانا حسین احمد مدنی نور اللہ مرقدہ کا یہ جملہ بڑا حوصلہ افزا ثابت ہوتا ہے، جو انھوںنے سولھویں اجلاس عام (منعقدہ: 16، 17، 18؍اپریل1949ء )کے خطبۂ صدارت میں ارشاد فرمایا تھا۔ اس سلسلۂ تحریر کو انھیں کے مبارک ارشاد پرمکمل کرتے ہیں کہ:
’’اور جس وقت اس ہلاکت و بربادی کا تصور دل کے ہر ایک گوشہ میں اور سینہ و جگر کی ہر ایک رگ میں رنج والم کی بے پناہ سوزش پیدا کرتا ہے، تو صرف یہی ایک حقیقت دل و دماغ میں کسی قدر سکون کی خفیف سی لہر پیدا کردیتی ہے کہ جمعیت علمائے ہند اور اس کے ہم نواؤں کے ہاتھ تقسیم ہندستان کے خون سے پاک ہیں۔‘‘
محمد یاسین جہازی
خادم مرکز دعوت اسلام جمعیت علمائے ہند
۷؍اکتوبر۲۰۲۵ء
